Diweddariad gweithredu diwydiannol, Mis Pride ac oriau agor yr haf

Darllenwch neges gan Claire Morgan, Rhag Is-Ganghellor, Addysg a Phrofiad y Myfyrwyr a anfonwyd at fyfyrwyr israddedig ac ôl-raddedig a addysgir ar 13 Mehefin.

Helo fyfyriwr,

Gobeithio eich bod yn cadw’n iawn. Wrth i ni gyrraedd diwedd y flwyddyn academaidd, roeddwn i eisiau anfon neges fer atoch cyn gwyliau’r haf.

Fel y gwyddoch, mae rhai staff sy’n aelodau o Undeb y Prifysgolion a’r Colegau (UCU) yn cymryd rhan mewn boicot marcio ac asesu. Hoffwn roi sicrwydd i chi ein bod yn gwneud popeth o fewn ein gallu i leihau effaith y gweithredu diwydiannol hwn arnoch chi. Gan y bydd yr effaith yn wahanol ar gyfer pob myfyriwr (mewn rhai achosion ni fydd unrhyw effaith o gwbl), bydd eich ysgol yn cysylltu â chi yr wythnos hon gyda mwy o wybodaeth am y camau rydym yn eu cymryd i’ch cefnogi’n benodol.

Bydd llawer ohonoch yn dychwelyd adref dros yr wythnosau nesaf, ond os ydych chi’n aros yng Nghaerdydd cofiwch efallai y bydd rhai o’n hadeiladau a’n gwasanaethau – gan gynnwys ein llyfrgelloedd, ein cyfleusterau chwaraeon a Cyswllt Myfyrwyr  – ar agor ac ar gael ar amseroedd gwahanol i’r arfer. Mae’n werth gwirio ymlaen llaw os ydych yn bwriadu defnyddio’r gwasanaethau hyn dros yr haf. Os ydych yn newid llety neu’n symud i ffwrdd, dilynwch ein cynghorion ar symud allan, cofiwch ddychwelyd eich llyfrau llyfrgell a ble bynnag yr ydych chi, cofiwch ofalu amdanoch chi’ch hun a’ch eiddo bob amser.

Mae graddedigion Caerdydd ymhlith rhai mwyaf cyflogadwy y DU

Roeddwn yn falch iawn o weld canlyniadau’r arolwg Hynt Graddedigion diweddaraf sy’n dangos bod graddedigion Prifysgol Caerdydd yn hynod gyflogadwy ym marn cyflogwyr y DU, a bod galw mawr amdanynt ymysg y cyflogwyr hynny. Er gwaethaf heriau’r blynyddoedd diwethaf, mae’n galonogol gwybod bod mwy o’n myfyrwyr yn sicrhau gwaith sy’n gofyn am sgiliau uchel, nag erioed.

Os ydych chi i fod yn graddio eleni, defnyddiwch ein cymorth Dyfodol Graddedigion. Rydyn ni’n cynnig adnoddau, cymorth a digwyddiadau i’ch helpu i ddeall eich opsiynau, cyflawni eich potensial a sicrhau swydd, mynd ymlaen i astudio ymhellach neu unrhyw gyfleoedd eraill yr hoffech chi eu dilyn.

Mis Balchder

Mis Balchder yw mis Mehefin – mis ar gyfer dathlu cymunedau LHDTC+ ledled y byd. Rwy’n gyfaill sy’n Aelod o Fwrdd Gweithredol y Brifysgol ar gyfer staff a myfyrwyr LHDTC+ ac mae’n rôl rwy’n hynod falch ohoni. Mae gennym lawer ar y gweill o ran dathlu mis Balchder eleni: beth am ymuno â mi ar gyfer brecwast yn y Prif Adeilad ddydd Sadwrn 17 Mehefin cyn gorymdaith Pride Cymru trwy ganol dinas Caerdydd?

Gallwch hefyd ddarganfod mwy am y rhwydweithiau LHDTC+ gallwch ymuno â nhw, a’r cymorth gan gydfyfyrwyr sydd ar gael gan ein myfyrwyr yw hyrwyddwyr lles LHDTC+ ar ein tudalen mewnrwyd Mis Balchder.

Wythnos Ffoaduriaid y Byd, 19 i 25 Mehefin

Yn gynharach eleni dyfarnwyd statws Prifysgol Noddfa i Brifysgol Caerdydd, statws sy’n cydnabod arfer da prifysgolion o ran croesawu pobl sy’n ceisio noddfa, rhoi cymorth iddynt a’u grymuso. Mae Wythnos Ffoaduriaid y Byd yn dechrau ddydd Llun 19 Mehefin a thrwy gydol yr wythnos byddwn yn rhannu straeon ymfudwyr dan orfod a cheiswyr lloches yn ein cymuned. Gallwch hefyd ddod i’n digwyddiad Lleisiau Tosturi yng Nghanolfan Bywyd y Myfyrwyr ar 21 Mehefin, lle gallwch glywed gan bobl sydd wedi ceisio diogelwch yng Nghymru ac sy’n codi eu llais dros newid.

Rwy’n dymuno gwyliau haf hapus i chi gyd ac yn gobeithio y cewch ymlacio.

Dymuniadau gorau,

Claire Morgan
Rhag Is-Ganghellor Addysg a Phrofiad y Myfyrwyr