Graddio

Darllenwch neges gan Claire Morgan, Rhag Is-Ganghellor, Addysg a Phrofiad y Myfyrwyr a anfonwyd ar 4 Mawrth.

Annwyl myfyrwyr/cynfyfyrwyr

Gobeithio eich bod yn cadw’n iawn ac yn edrych ymlaen at eich Diwrnod Graddio ym mis Gorffennaf. 

Yn dilyn ein ebost yn yr hydref a’r cyhoeddiad y byddwn yn cynnal y seremoni raddio yn  Stadiwm Principality yng Nghaerdydd, rydym yn falch o’ch hysbysu bod Cymru wedi dychwelyd i Lefel rhybudd 0 a bod cyfyngiadau COVID-19 wedi llacio. Rydym yn edrych ymlaen at y seremonïau graddio a’r cyfle i ddathlu eich llwyddiannau anhygoel, gyda miloedd o’ch cyd-raddedigion, staff y Brifysgol, cymrodyr er anrhydedd, gwesteion nodedig a’ch gwesteion. 

Diwrnod Eich Seremoni Raddio

Graddedigion 2020 ddydd Iau 21 Gorffennaf 2022   

• Israddedigion a raddiodd rhwng mis Awst 2019 a mis Rhagfyr 2020.  
• Myfyrwyr ôl-raddedig a raddiodd rhwng mis Gorffennaf 2019 a mis Gorffennaf 2020. 
• Y rheiny a ohiriodd gymryd rhan yn swyddogol yn 2019. 

Graddedigion 2021 ddydd Gwener 22 Gorffennaf 2022  

• Israddedigion a raddiodd rhwng mis Ionawr 2021 a mis Rhagfyr 2021. 
• Myfyrwyr ôl-raddedig a raddiodd rhwng mis Awst 2020 a mis Gorffennaf 2021.  

Graddedigion 2022 ddydd Mercher 20 Gorffennaf 2022  

• Israddedigion a raddiodd rhwng mis Ionawr 2022 a mis Gorffennaf 2022 
• Myfyrwyr ôl-raddedig a raddiodd rhwng mis Awst 2021 a mis Mehefin 2022.  

Os ydych i fod i raddio ddwywaith – er enghraifft gyda dyfarniad israddedig ac ôl-raddedig – cewch eich gwahodd i ymuno â’r ddwy seremoni a gallwch chi ddewis mynd i un neu’r ddwy. 

Yr hyn y gallwch ei ddisgwyl

Bydd diwrnodau graddio yn dilyn yr un fformat ar gyfer pob seremoni ‘Graddedigion’: 

• Bydd gwisgo gynau a thynnu lluniau swyddogol yn Neuadd y Ddinas  
• Bydd derbyniadau’r Ysgolion o amgylch y Ganolfan Ddinesig ac adeiladau’r brifysgol, o ganol y bore i ddechrau’r prynhawn 
• Bydd y brif seremoni yn dechrau am 18:00 a disgwylir i raddedigion gyrraedd o 15.30 ymlaen. Bydd gwesteion yn cyrraedd o 16:30 ymlaen. Rhaid i chi a’ch gwesteion fod yn eich seddi erbyn 17:45 yn barod i fwynhau ein siaradwyr a’n perfformiadau. 
• Bydd y graddedigion yn eistedd fesul Ysgol Academaidd o flaen y brif lwyfan, a bydd eu gwesteion yn gwylio o’r eisteddle. 
• Gan y bydd grwpiau blwyddyn cyfan yn ymuno â’i gilydd o’r newydd mewn un seremoni, ni fyddwch yn croesi’r llwyfan, ond byddwch yn sefyll ac yn dathlu fesul Ysgol o’ch lle ar y cae. 

Pryd a sut i gadw lle  

Byddwch yn gallu trefnu popeth sydd ei angen arnoch drwy borth archebu pwrpasol. Ym mis Ebrill, byddwn yn anfon ebost atoch i gofrestru, a byddwch yn gallu trefnu tocynnau ar gyfer y seremoni, gynau, lluniau swyddogol, tocynnau ar gyfer derbyniad yr Ysgolion a llety yn y brifysgol.  

Bydd pob myfyriwr graddedig yn derbyn eu tocyn eu hunain a dau docyn rhad ac am ddim ar gyfer y seremoni raddio a derbyniad yr Ysgol. Gallwch hefyd brynu dau docyn ychwanegol ar gyfer y Seremoni am £30 y tocyn ar adeg cadw lle yn unig. Os hoffech gael mwy na phedwar tocyn ar gyfer gwestai, bydd cyfle i brynu tocynnau ychwanegol ar gyfer y seremoni , drwy’r porth archebu, yn agosach at y dyddiad.  

Teithio a thrafnidiaeth

Mae sawl ffordd o deithio i Gaerdydd. Llenwch ein harolwg byr i’n helpu i gynllunio eich ymweliad. Mae Prifysgol Caerdydd wedi ymrwymo i gynaliadwyedd felly ystyriwch drafnidiaeth gyhoeddus lle bo’n bosibl.  

Rhagor o wybodaeth

Bydd y manylion am ein trefniadau graddio yn cael eu rhannu ar ein gwefan a’u diweddaru’n rheolaidd wrth i wybodaeth newydd ddod i law.

Rwy’n edrych ymlaen at ddathlu eich llwyddiannau gwych. 

Dymuniadau gorau, 

Claire Morgan
Rhag Is-Ganghellor Addysg a Phrofiad Myfyrwyr