Eich semester gwanwyn

Darllenwch neges gan Claire Morgan, Rhag Is-Ganghellor, Addysg a Phrofiad y Myfyrwyr a anfonwyd at fyfyrwyr israddedig ac ôl-raddedig a addysgir ar 18 Ebrill.

Annwyl fyfyriwr,

Croeso nol! – Rwy’n gobeithio eich bod wedi gallu gorffwys yn ystod y Pasg a’ch bod yn teimlo’n barod i ailgydio yn y semester newydd.

Y tro nesaf y byddwch chi yng Nghanolfan Bywyd y Myfyrwyr, gofalwch eich bod yn edrych ar y gwaith celf newydd sy’n dangos y 50 o’r newidiadau rydyn ni wedi’u gwneud yn y brifysgol yn dilyn eich adborth. Bydda i bob amser yn awyddus i bwysleisio pa mor bwysig yw eich adborth, a cheir llawer o ffyrdd y gallwch chi barhau i roi eich adborth.

Diolch i’r rhai ohonoch a gyflwynodd enwebiad ar gyfer y gwobrau Cyfoethogi Bywyd Myfyrwyr sydd ar ddod. Cawsom dros 1,300 o enwebiadau ar gyfer y gwobrau sy’n cael eu cynnal mewn partneriaeth â’r brifysgol ac Undeb y Myfyrwyr. Mae’r rhestr fer bellach wedi’i chwblhau, a gallwch ei darllen ar fewnrwyd y myfyrwyr. Edrychaf ymlaen at ddathlu gyda’r enwebeion a’r enillwyr ar 9 Mai.

Gornest y Prifysgolion

Rwy’n edrych ymlaen yn fawr at ymuno â chi yng Ngornest Prifysgolion Cymru ar 24 Ebrill. Mae Tîm Caerdydd yn teithio i Abertawe eleni i gystadlu mewn mwy na 30 o chwaraeon gan gynnwys gemau Rygbi Dynion a Merched yn Stadiwm Swansea.com. Pob lwc i’r rheini ohonoch chi sy’n cymryd rhan, a chan mai llysgenhadon y Brifysgol fyddwch chi ar y diwrnod, cofiwch ymddwyn yn gyfrifol wrth fwynhau’r digwyddiadau.

Bod yn Fyfyriwr Hyrwyddo

Bellach, rydyn ni’n recriwtio Myfyrwyr Hyrwyddo ar gyfer y flwyddyn academaidd nesaf a chewch wneud cais tan 12 Mai. Mae’r hyrwyddwyr yn chwarae rhan ganolog yn ein gwaith, gan weithio mewn partneriaeth ag Academi Dysgu ac Addysgu’r Brifysgol i ddatblygu a llunio’r profiad o fod yn fyfyriwr, yn ogystal â dysgu digidol yn gyffredinol. Byddwch chi hefyd yn ennill sgiliau a phrofiad i helpu o ran cyflogaeth yn y dyfodol.

Cefnogaeth at yr arholiadau

Gan fod arholiadau ac asesiadau ar y gorwel, gwn y bydd y semester olaf weithiau’n gyfnod llawn straen. Cofiwch beidio â brysio’n ormodol, blaenoriaethwch eich tasgau a defnyddiwch yr adnoddau astudio a chymorth sydd ar gael ichi. Cysylltwch ar bob cyfrif os byddwch chi’n cael trafferth.

Y flwyddyn olaf

Os ydych chi yn eich blwyddyn olaf, dylech chi fod wedi derbyn eich gwahoddiad i’r seremoni raddio a gallwch chi ddod o hyd i’r holl wybodaeth sydd ei hangen arnoch i gynllunio’ch diwrnod ar y wefan. Ar ben hynny, mae gennych chi tan 30 Ebrill i gwblhau’r Arolwg Cenedlaethol o Fyfyrwyr (NSS). Mae’r canlyniadau’n hynod bwysig, ac rydyn ni’n ymfalchïo yn y ffordd rydyn ni’n defnyddio’ch adborth i wella profiad y myfyrwyr yn barhaus.

Dymunaf y gorau ichi yn ystod y semester olaf hwn, a gobeithio y bydd yr ychydig o fisoedd nesaf yn rhai pleserus a chynhyrchiol.

Cofion gorau,

Claire