Paratoi ar gyfer eich dyfodol

Darllenwch neges gan Claire Morgan, Rhag Is-Ganghellor, Addysg a Phrofiad y Myfyrwyr a anfonwyd at fyfyrwyr israddedig ac ôl-raddedig a addysgir ar 29 Ionawr.

Helo,

Os ydych chi wedi sefyll arholiadau a chael eich asesu’r mis hwn, gobeithio bod popeth wedi mynd yn dda. Mae fy nghylchlythyr y mis hwn yn trin a thrafod ym mha ffordd rydyn ni’n eich helpu i baratoi ar gyfer y dyfodol ac ym mha ffyrdd eraill rydyn ni’n eich helpu yn ystod eich amser yma.

Rhan bwysig o’n rôl yw eich helpu i baratoi ar gyfer y dyfodol. Ydych chi wedi cael cyfle eto i ymweld â man newydd y tîm Dyfodol Myfyrwyr ar lawr cyntaf Canolfan Bywyd y Myfyrwyr? Roeddwn i yno’n ddiweddar, ac roedd hi’n wych ei weld yn brysur ac yn cael ei ddefnyddio’n dda.

Gall ein timau a Llysgenhadon Myfyrwyr gwych eich helpu i ddod o hyd i swydd neu gyfle i gael profiad gwaith tra byddwch chi yma. Gallan nhw hefyd eich helpu i baratoi ar gyfer yr yrfa yr hoffech chi ei dilyn ar ôl graddio. Yn y brifysgol, gall fod yn amser da i roi cynnig ar rywbeth newydd a dod i wybod nid yn unig beth rydych chi’n ei hoffi ond hefyd beth dydych chi ddim yn ei hoffi. Mae sesiynau sgiliau cyflogadwyedd, ffeiriau gyrfaoedd i gwrdd â chyflogwyr, cyfleoedd i dreulio amser dramor, Gwobr Caerdydd a mentora gyrfaol sy’n eich paru â gweithwyr proffesiynol y diwydiant.

Rydw i’n gwybod bod y cynnydd mewn costau byw yn y DU wedi golygu bod angen gwneud penderfyniadau mwy anodd wrth gyllidebu. Efallai eich bod yn poeni bod rhai cyfleoedd ddim yn bosibl i chi bellach. Byddwn i’n eich annog yn fawr i estyn allan a chysylltu â ni drwy’r porth Cyswllt Myfyrwyr. Fel arall, ewch i ddesg y tîm Cyswllt Myfyrwyr yng Nghanolfan Bywyd y Myfyrwyr. Mae cymorth ariannol ar gael, ac rydyn ni yma i’ch helpu i wneud y gorau o’ch amser yma.

Hefyd, mae digon o gyfleoedd ar gael i weithio a gwirfoddoli i ni. Ein interniaethau ar y campws â thâl, sy’n agor ddiwedd mis Chwefror, yn rhoi cyfle gwych i chi gael profiad gwaith mewn amrywiaeth eang o feysydd. Mae llawer o rolau ar gael hefyd ar gyfer helpu i gefnogi eich cyd-fyfyrwyr. Rydyn ni’n recriwtio i’r rolau hyn ar wahanol adegau o’r flwyddyn.

Mae ein cynllun Myfyrwyr sy’n Mentora wedi bod ar waith ers mwy na 10 mlynedd, ac yn yr amser hwnnw, mae 5,000 o fyfyrwyr sy’n mentora wedi cefnogi dros 40,000 o fyfyrwyr blwyddyn gyntaf, a hynny drwy gynnal mwy na 16,000 o sesiynau mentora. Gellir priodoli’r niferoedd hyn i gryfder ein cymuned o fyfyrwyr.

Os ydych chi am ddod yn fyfyriwr sy’n mentora ym mlwyddyn academaidd 2024/25, gallwch chi wneud cais o heddiw ymlaen. Byddwch chi’n helpu i gefnogi israddedigion blwyddyn gyntaf o’ch ysgol academaidd, ac oherwydd eich bod wedi bod yn fyfyriwr blwyddyn gyntaf o’r blaen, chi yw’r person gorau ar gyfer y rôl.

Gobeithio bod fy nghylchlythyr y mis hwn yn dangos ym mha ffyrdd gwahanol rydyn ni’n eich cefnogi chi a’ch dyfodol. Dyma ddymuno’r gorau i chi ar gyfer y semester newydd a 2024.

Cofion gorau,

Claire