Urddas a pharch i bawb

Y Dirprwy Is-Ganghellor, Damian Walford Davies, yn pwysleisio pa mor bwysig yw trin pobl ag urddas a pharch yn ystod cyfnod llawn tensiwn a phryder.

Un o brif gryfderau cymuned y Brifysgol yw ei hamrywiaeth, sy’n golygu bod gwahanol safbwyntiau a chredoau i’w cael.

Mae hyn wedi bod ar flaen fy meddwl, wrth i mi wylio (fel llawer ohonoch chi) y digwyddiadau trasig sy’n datblygu o hyd yn y Dwyrain Canol, a hynny yn ystod cyfnod o wrthdaro ehangach ledled y byd. Mae’r Is-Ganghellor, yr Athro Wendy Larner, wedi ysgrifennu atoch chi’n barod mewn perthynas â’r hynny a ddigwyddodd ar 7 Hydref a’r hyn sydd wedi digwydd ers hynny. Rydyn ni’n gwbl ymwybodol o bryderon ein staff a’n myfyrwyr, ac yn eu deall yn llwyr, wrth i’r gwrthdaro yn Gaza barhau.

Yn y cyd-destun hwn, roeddwn i am atgoffa ein cymuned – gan mai dyna’n union yw hi ac y mae angen iddi fod – o’r angen i drin pobl ag urddas a pharch. Mae’n rhaid i’n prifysgol fod yn lle diogel. Byddwn ni – pob un ohonon ni – yn dewis peidio â goddef aflonyddu a gwahaniaethu o unrhyw fath. Byddai rhai, yn siŵr, am i’r Brifysgol gymryd safiad clir ar y gwrthdaro. Mater o egwyddor yw ein bod yn rhoi pwyslais, mewn negeseuon fel hyn, ar y pethau sy’n ein huno: diogelu ein staff a’n myfyrwyr a chondemnio aflonyddu ac ysgogi o bob math.

Mis Ymwybyddiaeth o Islamoffobia yw hi, ac rydyn ni’n iawn i dynnu sylw at hyn. Ar yr un pryd, nid ydyn ni’n gwahaniaethu o gwbl rhwng un mis a’r 11 mis arall, nac rhwng un math a math arall o wahaniaethu. Mae hyn yn cynnwys gwrth-semitiaeth. Byddwn ni’n galw ymddygiad o’r fath allan ac yn gweithredu arno pan fyddwn ni’n ei weld.

Ar yr un pryd, mae’n iawn nad yw  ein hymrwymiad cadarn i ryddid barn o dan y gyfraith yn gwywo.

Os bydd unrhyw un yn aflonyddu arnoch chi neu’n gwahaniaethu yn eich erbyn, rydyn ni’n eich annog yn gryf i roi gwybod am hyn.

Cefnogaeth sydd ar gael i staff

Gall staff gysylltu â Care First, ein rhaglen cymorth i weithwyr, 24 awr y dydd, 7 diwrnod yr wythnos. Mae Care First yn cynnig llinell gymorth, adnoddau cyfrinachol, a chwnsela wyneb yn wyneb neu dros y ffôn yn rhad ac am ddim.

Cymorth lles staff.

Rydym yn cynnig cefnogaeth fugeiliol ac ysbrydol i holl aelodau o gymuned y Brifysgol ni waeth os oes gennych ffydd benodol. Gallwch gysylltu ag un o’n caplaniaid a byddant yn trefnu amser i gwrdd â chi neu gallwch eich rhoi mewn cysylltiad â rhywun sy’n gynrychiolydd o draddodiad ffydd eich hun.

Cael gafael ar gymorth – myfyrwyr

Os ydych chi’n poeni am effaith digwyddiadau diweddar ar eich astudiaethau, cysylltwch â’ch tiwtor personol i drafod ein polisi amgylchiadau esgusodol.

Cysylltwch â Cyswllt Myfyrwyr yng Nghanolfan Bywyd y Myfyrwyr i gael mynediad at unrhyw un o’n gwasanaethau cymorth i fyfyrwyr, gan gynnwys cwnsela a chyngor lles.

Gallwch gael cyngor annibynnol gan Undeb y Myfyrwyr. Mae’r tîm Cyngor i Fyfyrwyr yn darparu cyngor cyfrinachol a diduedd am ddim.

Rydym hefyd yn cynnig cefnogaeth fugeiliol ac ysbrydol i holl aelodau’r gymuned brifysgol p’un a oes gennych unrhyw ffydd benodol. Gallwch gysylltu ag un o’r caplaniaid a byddant yn trefnu amser i gwrdd â chi, neu gallwn eich rhoi mewn cysylltiad â chynrychiolydd o’ch ffydd eich hun.

Parch at bob aelod o’n cymuned

Mae gennym ymagwedd dim goddefgarwch tuag at hiliaeth, gwrthsemitiaeth, Islamoffobia, camdriniaeth, annogaeth neu aflonyddu yn ein prifysgol.

Os ydych chi neu unrhyw un rydych chi’n ei adnabod wedi profi, neu’n profi troseddau casineb neu unrhyw fath o ymddygiad treisgar a cham-drin, mae help ar gael i chi. Eich dewis chi yw p’un a ydych chi’n dweud wrth rywun am eich profiad, ond gallwch gael gafael ar gymorth cyfrinachol, anfeirniadol ac arbenigol gan ein Tîm Ymateb i Ddatgeliadau (DRT).

Gallwch gael gafael ar gymorth y DRT ni waeth a ydych am riportio’r digwyddiad yn ffurfiol i’r Heddlu neu’r brifysgol.

Sicrhau eich bod yn teimlo’n ddiogel ar y campws

Mae gan y brifysgol gefnogaeth diogelwch ar gael 24 awr y dydd a gellir cael gafael ar hyn unrhyw bryd drwy ffonio +44 (0)29 2087 4444, neu estyniad 744444 o linell dir prifysgol.

Ein ap SafeZone yw eich ffordd gyflym a hawdd i rybuddio ein tîm Diogelwch os oes angen help neu gymorth arnoch tra ar y campws. Os ydych oddi ar y campws bydd yr ap yn hysbysu’r heddlu bod angen cymorth arnoch.

Lawrlwythwch yr app SafeZone.

Hyfforddiant Cydraddoldeb, Amrywiaeth a Chynhwysiant

Dyma wybodaeth am hyfforddiant, yn cynnwys:

• Adnabod ac Ymateb i Hiliaeth
• Gweithdy Gadewch inni siarad am Hil
• Hyfforddiant Ymwybyddiaeth Gwylwyr
• Gloywi Cydraddoldeb ac Amrywiaeth
• Cydraddoldeb ac Amrywiaeth i Arweinwyr a Rheolwyr Tîm