Gwrthdaro yn y Dwyrain Canol: mae cymorth a chyngor ar gael

Mae’r digwyddiadau yn y Dwyrain Canol dros y pythefnos diwethaf wedi peri cryn ofid i sawl aelod o’n cymuned. Mae nifer o’n staff a’n myfyrwyr yn disgwyl gwybodaeth am eu teulu a’u ffrindiau yn Israel ac yn Gaza. Mae eraill yn ofni dioddef aflonyddwch a thrais, wrth i nifer y digwyddiadau hiliol, gwrthsemitig ac Islamoffobaidd gynyddu ledled y DU.  Hoffwn ddiolch i’r rhai ohonoch sydd wedi ysgrifennu ataf i rannu eich profiadau a’ch ofnau. Mae fy nghydymdeimlad dwysaf â phawb y mae’r drasiedi newydd hon yn effeithio arnynt.

Hoffwn i achub ar y cyfle hwn i atgoffa pawb bod pob un aelod o’n cymuned yn haeddu cael eu trin ag urddas a pharch. Mae’r safbwyntiau, profiadau a chefndiroedd amrywiol yn ein cymuned yn ein gwneud ni’n gryfach. Mae gennym ni’r hawl i anghytuno’n barchus â’n gilydd, wrth gwrs. Fodd bynnag, dydy gwahaniaethu ar sail hil, crefydd neu gred byth yn dderbyniol o dan unrhyw amgylchiadau. Fydd hiliaeth, gwrthsemitiaeth ac Islamoffobia ddim yn cael eu goddef ar y campws.

Rydyn ni wedi rhoi cyngor i’r rhai y mae’r gwrthdaro’n effeithio arnyn nhw. Mae’n esbonio ym mha ffordd y gallwn ni helpu ein myfyrwyr. Mae gwybodaeth isod am y gwasanaethau cymorth sydd ar gael i’r staff. Os ydych chi’n cael trafferth ymdopi, cysylltwch â’ch rheolwr llinell neu Bennaeth eich Ysgol neu adran. Rwy’n deall bod hanes hir ym Mhrifysgol Caerdydd o bobl yn cefnogi ei gilydd ar adegau anodd. Felly, rwy’n gofyn i bob un ohonoch chi barhau â’r traddodiad hwnnw a gofalu am eich gilydd, yn enwedig y rhai y mae hyn yn effeithio arnyn nhw fwyaf.

Mae cymorth a chyngor ar gael

Rydyn ni’n deall bod y digwyddiadau yn y Dwyrain Canol yn dal i beri gofid a straen i sawl aelod o gymuned y brifysgol.

Rydyn ni’n cydymdeimlo’n fawr â phawb y mae’r digwyddiadau hyn yn effeithio arnyn nhw.

Mae cymorth ar gael os bydd angen, a’n blaenoriaeth yw gwneud yn siŵr bod y brifysgol yn dal i fod yn lle diogel i bawb.

Mae gennym ni hanes cryf o ddod ynghyd i ddangos cefnogaeth i’n gilydd ar adegau anodd fel y rhain. Os ydych chi’n poeni amdanoch chi eich hun neu bobl eraill o’ch cwmpas, cysylltwch â ni.

Parchu pob aelod o’n cymuned

Nid ydyn ni’n goddef hiliaeth, gwrthsemitiaeth, Islamoffobia, camdriniaeth, ysgogiad nac aflonyddwch yn y Brifysgol o gwbl.

Gall myfyrwyr sy’n dioddef neu’n dyst i’r pethau hyn hysbysu’r Tîm Ymateb i Ddatgeliadau.

Dylai’r staff roi gwybod am unrhyw achosion i’w rheolwr llinell, yn unol â’r polisi Urddas yn y gwaith ac wrth astudio. Mae’r dulliau hyn o roi gwybod am achosion ar gael i’w defnyddio gan bob aelod o’n cymuned, p’un a ydyw wedi dioddef achos neu wedi bod yn dyst i achos.

Gwneud yn siŵr eich bod yn teimlo’n ddiogel ar y campws

Mae cymorth diogelwch ar gael gan y brifysgol 24 awr y dydd. Gallwch chi gael cymorth o’r fath unrhyw bryd drwy ffonio +44(0)29 2087 4444 (neu 74444 o linell dir yn y brifysgol).

Ap sydd ar gael i bob myfyriwr ac aelod o’r staff yw SafeZone er mwyn ei gwneud hi’n haws cysylltu â’r Adran Diogelwch yn uniongyrchol o ffôn symudol. Mae rhagor o wybodaeth am SafeZone a sut i’w lawrlwytho ar gael yma. Mewn argyfwng, dylech chi ffonio 999 a gofyn am y gwasanaeth priodol.

Cymorth i’r staff

Mae’r staff yn gallu cael cymorth gan Care First, a bydden ni’n annog yr aelodau hynny o’r staff y mae’r digwyddiadau wedi effeithio arnyn nhw i gysylltu â’u rheolwr llinell neu Bennaeth yr Ysgol/Pennaeth yr adran yn y Gwasanaethau Proffesiynol.

Rydyn ni hefyd yn cynnig cymorth bugeiliol ac ysbrydol i bawb sy’n rhan o gymuned y Brifysgol, p’un a ydyn nhw’n dilyn ffydd penodol neu beidio. Gallwch chi gysylltu ag un o’r caplaniaid, a fydd yn trefnu amser i gwrdd â chi. Fel arall, gallwn ni eich rhoi mewn cysylltiad â rhywun sy’n cynrychioli eich ffydd eich hun.

Cymorth i fyfyrwyr

Gall myfyrwyr gysylltu â’r tîm Cyswllt Myfyrwyr yng Nghanolfan Bywyd y Myfyrwyr er mwyn defnyddio unrhyw rai o’n gwasanaethau cymorth i fyfyrwyr, gan gynnwys cael cyngor cwnsela a lles.

Gall myfyrwyr hefyd gael cyngor annibynnol gan Undeb y Myfyrwyr. Gallwch chi gysylltu â’r tîm Cyngor i Fyfyrwyr yn Undeb y Myfyrwyr i gael cyngor cyfrinachol a diduedd yn rhad ac am ddim, a hynny drwy ebostio advice@caerdydd.ac.uk, ffonio +44(0)29 2078 1410 neu fynd i weld y tîm yn bersonol ar drydydd llawr Undeb y Myfyrwyr rhwng 09:30 a 16:30 o ddydd Llun i ddydd Gwener.

Os bydd myfyriwr yn poeni am effaith y digwyddiadau diweddar ar ei addysg, gall gysylltu â’i diwtor personol a thrafod ein polisi Amgylchiadau esgusodol.