Boicot marcio ac asesu

Annwyl gydweithiwr

Yn sgîl fy ebost cynharach i’r holl staff a thrafodaethau’r gweminar i’r holl staff, byddwch yn ymwybodol bod gweithredu diwydiannol yn digwydd yng Nghaerdydd ar ffurf boicot marcio ac asesu (MAB) yn unol ag eraill ar draws y sector. Anghydfod cenedlaethol yw hwn ac nid rhywbeth y gall Prifysgol Caerdydd ei ddatrys yn annibynnol.

Fel y dywedais yn aml o’r blaen, rydym yn rhan o fargeinio cyflog cenedlaethol, ac felly’n un o 144 o sefydliadau sy’n rhan o’r broses hon. Fodd bynnag, rydym yn parhau i ymgysylltu ag UCU Caerdydd ar faterion o fewn ein rheolaeth leol a lle gallwn wneud gwelliannau i gefnogi ein staff.

Rwy’n ysgrifennu heddiw yn dilyn cyfarfod gydag UCU Caerdydd lle buom yn trafod y posibilrwydd o ddatrysiad lleol i leddfu effaith y boicot ar ein myfyrwyr. Er bod y trafodaethau’n adeiladol, yn anffodus nid oeddem yn gallu dod o hyd i ffordd ymlaen.

Byddwch yn ymwybodol ein bod ninnau fel Prifysgol yn gwneud popeth o fewn ein gallu i liniaru camau gweithredu UCU, ac er ein bod o’r farn bod cyfran y cydweithwyr sy’n cymryd rhan yn isel, ni ellir tanbrisio’r effaith ar fyfyrwyr unigol ac mae’n arbennig o annheg i garfan sydd eisoes wedi profi cymaint o aflonyddwch dros y blynyddoedd blaenorol.

Yng ngoleuni hyn, rwy’n ysgrifennu atoch yn uniongyrchol fel aelodau staff i ofyn i chi wneud popeth o fewn eich gallu i amddiffyn ein myfyrwyr rhag yr effaith y gallai’r weithred hon ei chael arnynt.

Yn ogystal, rwyf am gadarnhau na fyddwn yn atal tâl am unrhyw gamau a gymerwyd ym mis Ebrill, Mai a Mehefin 2023 os bydd cydweithwyr sy’n cymryd rhan mewn boicot marcio ac asesu ar hyn o bryd yn cadarnhau wrth Bennaeth yr Ysgol erbyn diwedd dydd Llun 26 2023:

• mae’r holl asesiadau wedi’u marcio’n llawn a’u cyflwyno i Swyddfa’r Ysgol erbyn dydd Llun 3 Gorffennaf
• byddwch yn cyflwyno unrhyw bapurau arholiad ailsefyll a briffiau asesu sydd heb eu cyflwyno erbyn dydd Gwener 14 Gorffennaf.

Os na fydd cydweithwyr yn cyflwyno marciau neu bapurau fel y nodir uchod, byddwn yn tybio bod unrhyw farciau neu bapurau ar goll oherwydd eu cyfranogiad parhaus yn y boicot. Bydd hyn yn arwain at atal tâl yn unol â pholisi presennol y Brifysgol ar atal tâl am dorri contract (cyflawni dyletswyddau yn rhannol).

Bydd cydweithwyr sydd eisoes wedi cadarnhau ac yn parhau â’u cyfranogiad yn gweld didyniadau ar gyfer misoedd Ebrill a Mai yn eu cyflog ym mis Mehefin a bydd camau gweithredu mis Mehefin yn cael eu hadlewyrchu yn eu cyflog ym mis Gorffennaf.

Roeddwn am achub ar y cyfle olaf hwn i’w gwneud yn glir i gydweithwyr bod amser o hyd i osgoi peryglu rhagolygon ein myfyrwyr yn y dyfodol ac osgoi colli cyflog. Mae ein myfyrwyr yn haeddu ein cefnogaeth wrth iddynt wneud eu ffordd i mewn i’w bywydau yn y dyfodol, ac mae’n rhaid i ni ddod o hyd i ffyrdd eraill o ddatrys ein gwahaniaethau.

Wrth i’r sefyllfa hon ddatblygu, byddwn yn parhau i roi’r wybodaeth ddiweddaraf i chi. Cofiwch gadw golwg ar dudalennau mewnrwyd y staff i gael yr holl wybodaeth ddiweddaraf a chwestiynau cyffredin.

Dymuniadau gorau

Colin Riordan
Is-Ganghellor