Dathlu Wythnos y Gwirfoddolwyr 2026

Dathlu 7,853 o oriau o gyn-fyfyrwyr yn gwirfoddoli

Mae Wythnos y Gwirfoddolwyr yn ddathliad blynyddol a gynhelir o ddydd Llun 1 Mehefin i ddydd Sul 7 Mehefin i gydnabod cyfraniad miliynau o bobl ledled y DU trwy wirfoddoli yn eu cymunedau.

Bob blwyddyn, mae ein cyn-fyfyrwyr gwych sy’n gwirfoddoli yn cael effaith enfawr ar bopeth a wnawn yma ym Mhrifysgol Caerdydd, boed hynny wrth gefnogi myfyrwyr a chyn-fyfyrwyr eraill drwy gynlluniau mentora, eistedd ar fyrddau’r Brifysgol, bod yn rhan o gangen cyn-fyfyrwyr, dychwelyd i Brifysgol Caerdydd i roi cyflwyniad ar yrfaoedd i ysbrydoli’r genhedlaeth nesaf o raddedigion, neu gynnig interniaethau i’n myfyrwyr. Dysgwch fwy am wirfoddoli.

Rydyn ni am fanteisio ar y cyfle hwn i ddiolch yn arbennig i bob un o’n cyn-fyfyrwyr sy’n gwirfoddoli. Mae eich cefnogaeth chi yn gwneud gwahaniaeth go iawn i gymuned Prifysgol Caerdydd.

Mae ein cyn-fyfyrwyr sy’n gwirfoddoli wedi rhannu eu profiadau a sôn am y boddhad maen nhw’n ei gael wrth wneud hynny.

Maddison Coomber (LLB 2023)

Ar y cyd â Phrifysgol Caerdydd, mae’r rhaglen Llwybrau at y Gyfraith yn cefnogi myfyrwyr talentog ysgolion a cholegau lleol i ystyried y sector cyfreithiol. Daeth Maddison yn ôl i’r Brifysgol i sgwrsio â grŵp o 50 o fyfyrwyr Blwyddyn 12 am eu profiadau o ymuno â byd y gyfraith a sut beth yw’r proffesiwn mewn gwirionedd. Rhagor o wybodaeth.

“Dyma oedd y trydydd tro i mi wirfoddoli, ac rwy’n mwynhau dal i fyny â’r staff a ddylanwadodd ar fy mhrofiad a chwrdd â myfyrwyr sydd ar ddechrau eu profiadau eu hunain. Mae wir yn cwblhau’r cylch. Pan oeddwn i’n fyfyriwr, roedd clywed gan gyn-fyfyrwyr yn gwneud i ddyfodol ym maes y gyfraith deimlo’n llai haniaethol ac yn fwy cyraeddadwy. Trodd ‘Ryw ddydd, rwy’n gobeithio…’ yn ‘Mae hyn yn bosibl i mi.’”

Hannah Williams (BSc 2014)

Roedd Hannah yn fentor yn ein cynllun Menywod yn Mentora 2026 a welodd 24 o fentoriaid sy’n gyn-fyfyrwyr yn cael eu paru â mentoreion sy’n gyn-fyfyrwyr ar ddechrau eu gyrfa.

“Mae’r profiad wedi bod yn ddymunol ac yn fuddiol i bawb. Rwy wir wedi gwerthfawrogi cyfle i rannu fy safbwynt, wrth hefyd edrych yn ôl ar fy nysgu fy hun drwy’r sgyrsiau hyn. Braint go iawn oedd cael fy newis yn un o’r 24 o fentoriaid sy’n gyn-fyfyrwyr, ac rwy’n ddiolchgar iawn o fod wedi bod yn rhan o’r rhaglen eleni. Mae mentora yn un o’r cyfleoedd prin hynny lle rydych chi’n rhannu dealltwriaeth ond yn ei chael yn ôl ar ei chanfed– ac mae’r profiad hwn wedi bod yn union hynny.”

Dale Perrett (BScEcon 1989)

Dale yw un o’r cyfarwyddwyr a sefydlodd Novo Executive Search and Selection ac mae’n angerddol dros feithrin y genhedlaeth nesaf o dalent. Dros lawer o flynyddoedd, mae Novo wedi cynnig profiad yn y byd go iawn, mentora proffesiynol a llwybr i swydd ar ôl graddio i fyfyrwyr Ysgol Busnes Caerdydd. Rhagor o wybodaeth.

“Mae myfyrwyr ar leoliad yn dod â safbwyntiau newydd i’r busnes. Maen nhw’n herio rhagdybiaethau mewn ffordd adeiladol ac yn aml yn sylwi ar bethau nad yw eraill wedi’u hystyried. “Mae llawer o’n graddedigion wedi dod drwy’r llwybr hwn, sy’n golygu eu bod yn ymuno â ni eisoes yn deall ein diwylliant a’n disgwyliadau. Mae rhywbeth unigryw am fyfyrwyr o Brifysgol Caerdydd. Maen nhw’n dueddol o fod yn bragmatig, yn feddylgar, ac yn fasnachol ymwybodol yn gynharach na llawer. Roedd cynnig lleoliadau yn caniatáu i ni roi profiad go iawn i fyfyrwyr tra ein bod hefyd yn adeiladu ffrwd o weithwyr talentog y dyfodol ar gyfer Novo. Mae partneriaethau cryf yn creu llif dwy ffordd o werth. Mae Prifysgolion yn cael cipolwg ar y diwydiant, ac mae sefydliadau yn cael mynediad cynnar at dalent newydd.”

Mina Okuru Addico (MA 2019)

Mina yw un o arweinwyr Cangen Cyn-fyfyrwyr Prifysgol Caerdydd yn Ghana. Rhagor o wybodaeth am Ganghennau Cyn-fyfyrwyr.

“Ers dychwelyd i Ghana yn 2019 ar ôl fy astudiaethau, rwy wastad wedi bod eisiau dwyn ynghyd bobl o Ghana a astudiodd ym Mhrifysgol Caerdydd – wedi’r cyfan, cafodd rhai o’r meddyliau disgleiriaf sy’n cyfrannu at Ghana heddiw eu hyfforddi yno. Gweithio gyda’r swyddfa cysylltiadau â chyn-fyfyrwyr i wireddu’r weledigaeth hon oedd yn ffordd berffaith i’w wneud. Roedd arwain lansiad Cangen Ghana Prifysgol Caerdydd yn bleser. Rhoddodd gyfle i mi gysylltu â chyn-fyfyrwyr rwy’n edmygu eu gwaith a’u heffaith yn fawr ar draws gwahanol feysydd, a chreu platfform ar gyfer rhwydweithio, rhannu gwybodaeth a chreu effaith ar y cyd yn Ghana.”

Emma Barlow (BA 2009)

Cymerodd Emma ran yn rhaglen mentora gyrfaoedd y Brifysgol a chafodd ei pharu ag Erin, sy’n fyfyriwr. Gwnaeth Emma ac Erin gysylltu yn gyflym ac arweiniodd yr hyn a ddechreuodd fel cyfres o sesiynau mentora ar-lein at interniaeth, gan roi cyfle i Erin gael profiad ymarferol. Rhagor o wybodaeth.

“Ar ôl sawl sesiwn ar-lein gydag Emma, daeth yn amlwg ein bod wedi sefydlu perthynas dda, ac roeddwn i wedi rhannu llawer am fy ngwaith a’r diwydiant. Roeddwn i’n gwybod y byddai profiad gwaith yn werthfawr – fel yr oedd wedi bod i mi – a byddai Erin yn ffitio i mewn yn berffaith yn Northstar. Diolch byth, cytunodd fy nghyfarwyddwyr gwych.” Adeiladodd yr interniaeth ar y pethau roedden nhw wedi’u trafod yn ystod eu sesiynau mentora a rhoddodd gyfle i Erin weld yn uniongyrchol sut mae’r diwydiant yn gweithio.”

Ni fyddai’n bosib cyflawni’r hyn rydyn ni’n ei wneud heb wirfoddolwyr gwych, felly os hoffech chi roi rhywbeth yn ôl, dewch i gymryd rhan. Darganfod mwy.