Fy mhrofiad o Fenywod yn Mentora – Emma Young (BSc 1996)

Awdur yw Emma Young (BSc 1996). Hi hefyd yw sefydlydd a Chyfarwyddwr Emma Young Consulting Ltd. Mae’n gynghorydd cynaliadwyedd annibynnol, ac mae ganddi ddiddordeb angerddol mewn gallu straeon i newid y byd. Mae wedi treulio dros 20 mlynedd yn y proffesiwn, gan gynnwys naw mlynedd yn BT Group lle bu’n creu ac yn arwain strategaeth gyfathrebu’r cwmni rhyngwladol ym maes cynaliadwyedd.

Ers dod yn gynghorydd annibynnol yn 2013, mae Emma wedi gweithio gydag ystod eang o gleientiaid, gan roi arweiniad strategol, rhannu ei harbenigedd mewn cyfathrebu ac ymgysylltu, a rheoli’r gwaith o gyflwyno adroddiadau ar gynaliadwyedd.

Cymerodd Emma ran yn ein cynllun Menywod yn Mentora yn 2025, a oedd wedi paru 26 o fentoriaid â mentoreion ar ddechrau eu gyrfaoedd. Mae hi’n rhannu ei phrofiadau o fod yn fentor a’r cipolwg gwerthfawr a gafodd drwy gymryd rhan yn y rhaglen.

Pam gwnaethoch chi benderfynu ymuno â chynllun Menywod yn Mentora i fod yn fentor?

Penderfynais i’n syth bod yn rhaid i mi ymuno – er fy mod i wedi bod yn gweithio am amser hir, rwy erioed wedi cael mentor fy hun. Pan o’n i’n gweithio mewn amgylchedd corfforaethol, doedd dim rhaglen swyddogol ar gael, a do’n i ddim yn teimlo’n ddigon hyderus i ofyn i uwch-arweinwyr fy mentora i.

Ers hynny, rwy wedi mentora pobl eraill drwy gyrff proffesiynol, ond dw i erioed wedi cael fy mharu â mentor fy hun. Yn ystod y blynyddoedd diwethaf, dwi wedi gweithio gyda hyfforddwr busnes arbennig. Rwy hefyd yn coetsio awduron sy’n dod i’r amlwg ac sy’n cael trafferth goresgyn problemau gyda’u hyder. Felly, yr ateb byr yw, ro’n i eisiau cynnig y math o gymorth ro’n i ei angen fy hun ar un adeg.

Pam mae cynllun o’r fath yn bwysig i chi?

Dw i’n meddwl bod rhai menywod yn poeni am ofyn am arweiniad a chymorth. Rwy’n gwybod y gwnes i deimlo fel hynny. Os nad ydych chi’n mynd ar ôl twf personol neu broffesiynol, gallwch chi golli’r cyfleoedd sydd ar gael. Mae cynlluniau megis Menywod yn Mentora yn werthfawr iawn gan eu bod yn cynnig ffyrdd haws o groesawu cyfleoedd a thwf.

Yr hyn dw i wedi’i ddysgu dros y blynyddoedd yw bod pobl ddawnus dawel yn aml yn cael eu diystyru tra bod pobl llai dawnus sy’n fodlon codi eu llais yn cael y sylw. Pan fydd menywod yn cael cymorth i wneud eu hunain yn amlwg, mae pawb yn elwa, gan gynnwys sefydliadau.

Allwch chi ddweud wrthyn ni am yr hyn sydd ynghlwm wrth y mentora?

Rwy’n cynnig pedair sesiwn un-i-un wythnosol i fy mentoreion. Mae pob un yn para tua hanner awr. Sylweddolais i fod sesiynau un-i-un yn arwain at drafodaethau mwy buddiol a gonest. Diben y sesiwn gyntaf yw ‘dod i’ch adnabod chi’, lle byddwn ni’n canolbwyntio ar yr hyn y mae’r mentoreion eisiau ei drafod fwyaf. O hynny ymlaen, rwy’n cynllunio’r sesiynau sy’n weddill i ganoli’n bennaf ar eu nod.

Ar ôl pob cyfarfod, rwy’n anfon crynodeb byr sy’n cynnwys nodiadau, myfyrdodau ac enwau unrhyw lyfrau, erthyglau neu adnoddau perthnasol. Os oes ganddyn nhw rywbeth pwysig ar y gweill, megis cyfweliad, bydda i’n ceisio anfon neges atyn nhw ar y diwrnod oherwydd, weithiau, mae angen i ni gydwybod bod rhywun yn meddwl amdanon ni.

Sut mae’r mentora wedi cael effaith gadarnhaol ar eich gyrfa?

Er nad ydw i wedi cael mentor ffurfiol, mae gweithio gyda hyfforddwr wedi newid pethau’n sylweddol i fi. Ac mae mentora eraill wedi bod yr un mor werthfawr – dw i’n dysgu rhywbeth newydd bob tro. Mae’n broses ddwyffordd o gyfnewid gwybodaeth a chael cymorth, ac rwy’n credu’n gryf fy mod i’n elwa o hynny cymaint â’r mentoreion.Rhannwch un awgrym defnyddiol y byddech chi’n ei roi i fenywod ar ddechrau eu gyrfaoedd/chi eich hun pan oeddech chi’n iau.

Dw i ddim yn hoffi rhoi cyngor cyffredinol oherwydd bod llwybr pawb mor bersonol. Ond pe gallwn i ddweud un peth wrthyf fi fy hun pan oeddwn i’n iau, byddwn i’n dweud: treulia amser ar geisio deall pwy wyt ti.

Dim ots a yw hynny’n golygu mynd i therapi, dod o hyd i hyfforddwr neu fentor, ysgrifennu mewn dyddiadur, mynd ar enciliadau – gwnewch beth bynnag sy’n eich helpu i ddeall beth sy’n eich ysgogi a pham, gan fod y math yna o hunan-wybodaeth yn archbŵer.Rwy’n teimlo fel fy mod i wedi bod ar daith bersonol drwy gydol fy mywyd, ond erbyn hyn, yn ystod ail hanner fy mywyd, rwy’n teimlo o’r diwedd bod gen i syniad da o bwy ydw i a beth sydd ei eisiau arna i. Mae’n debyg i gael canllaw cynhwysfawr ar gyfer technoleg ddryslyd yn lle chwilio am atebion mewn fforymau i ddefnyddwyr! Ac, yn olaf, byddwch yn garedig. Bob amser. Oherwydd bod hynny’n archbŵer, hefyd.

Rhowch eich amser, eich arbenigedd a’ch profiad i gefnogi ac ysbrydoli myfyrwyr a chyn-fyfyrwyr eraill. Darllen mwy.