Newid adfywiol mewn gyrfa – I Gynfyfyrwyr, Gan Gynfyfyrwyr
28 Awst 2024![](https://blogs.cardiff.ac.uk/alumni/wp-content/uploads/sites/323/2024/08/Ceri-Jones-1-875x492.jpeg)
Cyn iddi ailhyfforddi i fod yn gogydd, treuliodd Ceri Jones (BMus 2003) ddegawd yn adeiladu gyrfa yn y diwydiant cerddoriaeth. Yma, mae hi’n myfyrio ar ei phrofiad o gymryd y naid, ac i le mae ei hangerdd am goginio wedi mynd â hi hyd yn hyn.
Yn 2003, graddiais i o Brifysgol Caerdydd gyda BMus, ac ro’n i’n benderfynol o ddod o hyd i lwybr gyrfa yn y diwydiant cerddoriaeth glasurol – felly sut wnes i ddod i addysgu coginio ac ysgrifennu llyfr coginio?
I ddechrau, fe wnes i gychwyn ar lwybr yn y diwydiant cerddoriaeth. Yn syth ar ôl graddio o Brifysgol Caerdydd, fe ddechreuais i weithio ar leoliad yn nhîm gweinyddol Cerddorfa Oes yr Oleuedigaeth (OAE), a daeth honno’n swydd barhaol. Yn ystod y 10 mlynedd pan oeddwn i’n gweithio i’r OAE, ro’n i wastad yn dynn ar sodlau cerddorion proffesiynol, ac yn trefnu cyngherddau a theithiau. Dyna’r yrfa ro’n i wastad wedi bod a bryd arni, ac ar ôl bod yn rhan o’r byd cerddorol ers yn ifanc, do’n i ddim wedi bwriadu gwneud unrhyw beth arall.
Serch hynny, ar ôl tua wyth mlynedd yn OAE, daeth yr ysfa am newid. O un flwyddyn i’r llall, dechreuodd y calendr o gyngherddau a theithiau ddilyn yr un hen drefn, a dim ond hyn a hyn o weithiau y gallai unrhyw un oddef gorfod trefnu fisâu i gerddorion ar fyr rybudd, neu oddef yr holl ffwdan o orfod cofrestru wrth y ddesg yn y maes awyr am 6 o’r gloch y bore. Bryd hynny, ro’n i hefyd wedi dechrau datblygu fy angerdd am goginio gartref, wedi dechrau rhannu ryseitiau ar flog, ac ro’n i’n dyheu am ysgrifennu llyfr coginio.
![](https://blogs.cardiff.ac.uk/alumni/wp-content/uploads/sites/323/2024/08/Ceri-Food-Educator-1.jpeg)
Yn ystod yr un cyfnod, aeth fy Mam yn ddifrifol wael, prin bedair blynedd ar ôl i fy nhad farw. Arhosais yn fy swydd am gyfnod llawer hirach nag y dylwn i fod wedi. Roedd angen sefydlogrwydd arnaf i ar adeg lle’r oeddwn i dan straen aruthrol. Pan fu farw Mam rhai misoedd ar ôl fy mhen-blwydd yn 30 oed, roedd yn bryd imi newid pethau. Wedi i’r broses o werthu cartref y teulu ddod i ben yn fuan wedyn, ro’n i’n teimlo’n ddigon cadarn yn ariannol i ymddiswyddo a chofrestru ar gwrs hyfforddi cogyddion am chwe mis. Ro’n i’n dwlu ar y cwrs – roedd y profiad o ymgolli mewn rhywbeth newydd yn un mor adfywiol.
Yn ystod fy amser dan hyfforddiant, ro’n i’n helpu mewn ysgol goginio. Roedd yn teimlo fel y ffordd orau o ddefnyddio fy sgiliau newydd. Ro’n i wrth fy modd yn rhannu fy mân awgrymiadau a helpu i roi hwb i hyder y rhai oedd yn cymryd rhan. Ar y pryd, doedd gen i ddim syniad beth o’n i’n mynd i’w wneud ar ôl imi gymhwyso’n gogydd newydd, ond y gobaith oedd y byddai addysg bwyd yn rhan o fy nghynlluniau mewn rhyw ffordd neu gilydd. Mae 11 mlynedd wedi mynd heibio ers imi newid gyrfa, ac ar ôl rhoi cynnig ar ambell i swydd llawrydd, mae fy ngwaith bellach wedi’i rannu i dri phrif faes – gweithio’n rhan-amser yn addysgu ym maes Bwyd a Choginio yn y Garden Museum yn Llundain, ysgrifennu am fwyd, a bod yn gogydd o dro i dro.
A minnau’n addysgwr ym maes bwyd, rwy’n arwain gweithdai i ystod eang o bobl, yn dechrau o bump oed a hŷn. Mae’r swydd yn hynod foddhaus, a phleser yw gweld unigolion yn mireinio sgiliau nad oedden nhw hyd yn oed wedi sylweddoli bod ganddyn nhw. Yn y sesiynau coginio, rydyn ni wastad yn mynd i’r afael â sgiliau cyllyll, dysgu sut i werthfawrogi llysiau, technegau coginio syml, a sut i ychwanegu blas at fwyd. Fel nifer o bobl sydd o’r un oedran â fi, doedd dim llawer o gyfleoedd inni astudio addysg bwyd yn yr ysgol, a dysgais fy hun sut i goginio yn y brifysgol pan ro’n i wedi diflasu â choginio pasta â pesto. Mae’n wych gallu defnyddio fy sgiliau a fy ngwybodaeth er mwyn ateb y galw am addysg goginio, yn enwedig ar gyfer yr unigolion hynny na chawson nhw’r cyfle i’w hastudio yn y gorffennol.
![](https://blogs.cardiff.ac.uk/alumni/wp-content/uploads/sites/323/2024/08/Ceri-Jones-Veg-shop-1.jpeg)
Yn gynharach eleni, ar ôl gwneud cryn dipyn o waith arno, fe wnes i gyhoeddi fy llyfr coginio cyntaf, sef ‘It Starts with Veg: 100 seasonal suppers and sides’ a gafodd ei gyhoeddi gan Pavilion Books, sy’n rhan o Harper Collins. A thrwy gyd-ddigwyddiad llwyr, mae fy ngolygydd comisiynu, Lucy Smith, hefyd yn gyn-fyfyriwr o Brifysgol Caerdydd! Mae ‘It Starts with Veg’ yn llyfr llawn ryseitiau, yn ogystal â bod yn llawlyfr ar lysiau. Mae’n cynnwys beth i’w wneud â 40 o lysiau gwahanol ac yn cynnwys 100 o ryseitiau ar sut i’w coginio – dyma lyfr a defnyddiol os hoffech chi fwyta amrywiaeth ehangach o lysiau neu’n chwilio am ychydig o ysbrydoliaeth ynghylch beth i wneud gyda moronen!
Mae ysgrifennu ryseitiau yn ymddangos yn hollol wahanol i gerddoriaeth. Ond sut fyddwn i erioed wedi ymroi i’r dasg anferth o ysgrifennu llyfr heb y blynyddoedd o brofiadau y ces i yn dysgu ac ymarfer offeryn cerdd? Mae 11 mlynedd wedi mynd heibio ers imi newid gyrfa, ac rwy’n hapus o hyd fy mod i wedi gwneud y newid hwnnw – er fy mod i eto i gyrraedd yr un cyflog oedd gen i gynt, sy’n un anfantais. Rwy’ hefyd wedi sylweddoli bod creadigrwydd wrth goginio ac ysgrifennu yn rhoi rhywbeth imi nad oedd y gerddorfa yn gallu ei gynnig – ro’n i’n gweithio mewn diwydiant creadigol, ond doedd fy swydd yn un creadigol o gwbl. Bellach, rwy’n canu ac yn chwarae cerddoriaeth er pleser yn unig, ac yn ceisio gwrthsefyll y demtasiwn i wneud unrhyw waith gweinyddol/trefnu!
Gallwch chi ddod i wybod mwy am waith Ceri a’i llyfr ar ei gwefan cerijoneschef.com a dod o hyd iddi ar Instagram ac X: @cerijoneschef.
‘I Gyn-fyfyrwyr, Gan Gyn-fyfyrwyr’ yw ein cyfres newydd o flogiau sy’n rhoi sylw i’r straeon yr hoffech chi sôn amdanyn nhw wrth eich cyfoedion. Efallai eich bod yn rhan o brosiect cymunedol anhygoel neu fod eich sefydliad yn arloesi ac yn datrys problemau? Cyflwynwch eich syniad.
- Awst 2024
- Gorffennaf 2024
- Mehefin 2024
- Mai 2024
- Ebrill 2024
- Mawrth 2024
- Chwefror 2024
- Ionawr 2024
- Rhagfyr 2023
- Tachwedd 2023
- Hydref 2023
- Medi 2023
- Awst 2023
- Gorffennaf 2023
- Mehefin 2023
- Mai 2023
- Ebrill 2023
- Mawrth 2023
- Chwefror 2023
- Ionawr 2023
- Tachwedd 2022
- Hydref 2022
- Medi 2022
- Awst 2022
- Gorffennaf 2022
- Mehefin 2022
- Mai 2022
- Ebrill 2022
- Mawrth 2022
- Chwefror 2022
- Ionawr 2022
- Rhagfyr 2021
- Tachwedd 2021
- Hydref 2021
- Medi 2021
- Awst 2021
- Gorffennaf 2021
- Mehefin 2021
- Mai 2021
- Ebrill 2021
- Mawrth 2021
- Chwefror 2021
- Ionawr 2021
- Rhagfyr 2020
- Tachwedd 2020
- Hydref 2020
- Medi 2020
- Awst 2020
- Gorffennaf 2020
- Mehefin 2020
- Mai 2020
- Ebrill 2020
- Mawrth 2020
- Ionawr 2020
- Rhagfyr 2019
- Tachwedd 2019
- Hydref 2019
- Medi 2019
- Awst 2019
- Gorffennaf 2019
- Mai 2019
- Ebrill 2019
- Mawrth 2019
- Chwefror 2019
- Ionawr 2019
- Rhagfyr 2018
- Tachwedd 2018
- Hydref 2018
- Medi 2018
- Awst 2018
- Gorffennaf 2018
- Mehefin 2018
- Mai 2018