Cyn-fyfyrwyr Prifysgol Caerdydd yn llunio gyrfaoedd y dyfodol drwy brofiad gwaith

Fel myfyrwyr, ymunodd Hin Fung (Tony) Tsang (MSc 2025) a Wajiya Jawaid (MSc 2025) â’r ymgynghoriaeth datblygu ac adeiladu Lee Wakemans fel rhan o interniaethau Trawsnewid Digidol. Ar ôl cwblhau’r rhaglen, cynigiwyd swyddi parhaol i’r ddau ohonynt, gan roi hwb i’w gyrfaoedd a’u galluogi i gefnogi’r garfan nesaf o fyfyrwyr ar brofiad gwaith.

Mae Charlotte Evans yn Rheolwr Datblygu Busnes yn Lee Wakemans ac mae hi wedi astudio ym Mhrifysgol Caerdydd ei hun yn y gorffennol. I ddechrau, cyfarfu â thîm Profiad Gwaith Prifysgol Caerdydd i drafod gofynion y cwmni o ran interniaethau.

Esboniodd Charlotte: “Daeth fy nghymhelliant dros gynnig lleoliadau o angen busnes ymarferol i gael mwy o waith wedi’i gwblhau’n fewnol, heb ddibynnu bob amser ar gymorth allanol costus. Roedd yn gwneud synnwyr rhoi cyfle i fyfyrwyr galluog, gan gynnwys myfyrwyr meistr, gyfrannu, dysgu a magu hyder wrth gefnogi prosiectau sy’n mynd rhagddynt.”

Helpodd yr interniaeth 12 wythnos o hyd Tony a Wajiya i wella eu sgiliau proffesiynol, magu eu hyder, a datblygu eu gallu i ddatrys problemau a gweithio fel tîm. Fe wnaethon nhw gymryd perchnogaeth dros eu prosiectau a chreu systemau a mentrau newydd i Lee Wakemans.

Myfyriodd Tony ar ei gyfnod fel intern: “Yr uchafbwynt i mi oedd adeiladu cymhwysiad pwrpasol, gan gynnwys cronfa ddata, o’r newydd i symleiddio prosesau, gan ddatrys problemau busnes go iawn gan ddefnyddio’r hyn a ddysgais ar fy nghwrs. Mae’r system yn dal i fod ar waith heddiw ac yn dal i ehangu.”

Tynnodd Wajiya sylw at werth ychwanegol ennill profiad proffesiynol yn ystod ei chwrs: “Cefais brofiad gwerthfawr cyn cwblhau fy ngradd meistr, sy’n bwysig iawn fel myfyriwr rhyngwladol. Rhoddodd y cyfle i ymuno â Lee Wakemans tra oeddwn i’n dal i astudio rywbeth i mi y byddaf yn ddiolchgar amdano byth – sef y cyfle i roi popeth roeddwn i’n ei ddysgu ar waith mewn amgylchedd proffesiynol go iawn a chefnogol.”

Drwy groesawu myfyrwyr i’r gweithle, cafodd Lee Wakemans safbwyntiau ffres, syniadau arloesol, a chapasiti ychwanegol i gefnogi prosiectau allweddol. Gan eu bod yn newydd i gyflogi myfyrwyr drwy brofiad gwaith, croesawodd y tîm yr ychwanegiadau diweddar a’r buddion y gall mewnwelediad ffres a sgiliau allweddol eu cael er mwyn diwallu anghenion busnes.

Rhannodd cyfarwyddwr y cwmni, Mike Hughes, ei feddyliau ar y rhaglen: “Mae cynnig lleoliadau wedi ein galluogi i ddod â meddwl ffres i’r busnes wrth roi profiad ystyrlon ac ymarferol i fyfyrwyr ar brosiectau go iawn. Nid yw hyn wedi bod yn ymarfer ticio blychau; mae’r myfyrwyr wedi cyfrannu at feysydd sy’n wirioneddol bwysig i ni, gan gynnwys datblygu systemau, rheoli data, a gwella prosesau mewnol. Mae eu mewnbwn wedi ein helpu i symud prosiectau ymlaen a allai fod wedi cymryd llawer mwy o amser neu fod wedi gofyn am gymorth allanol fel arall.

“Rwy’n credu bod lleoliadau profiad gwaith yn hynod fuddiol i gyflogwyr a myfyrwyr fel ei gilydd. Mae myfyrwyr yn cael profiad o amgylchedd gwaith proffesiynol, yn deall disgwyliadau busnes, ac yn magu hyder, tra bod cyflogwyr yn elwa ar frwdfrydedd, syniadau newydd a gallu ychwanegol. Mae hefyd yn caniatáu i fusnesau gefnogi talent y dyfodol a rhoi rhywbeth yn ôl mewn ffordd ymarferol a gwerth chweil.”

Ysgogodd llwyddiant clir yr interniaethau fuddsoddiad pellach yn eu gyrfaoedd cynnar pan gynigiwyd contractau parhaol i Tony a Wajiya.

Mae Tony, sydd bellach yn ddatblygwr systemau TG, wedi cwblhau’r cylch, gan gefnogi’r genhedlaeth nesaf o fyfyrwyr Caerdydd ar brofiad gwaith.

Nid yw straeon Tony a Wajiya yn unigryw, gyda nifer gynyddol o sefydliadau yn cydnabod gwerth recriwtio myfyrwyr talentog y maent wedi’u cefnogi trwy brofiad gwaith.

Cyflogodd Arwen McCarthy, Cyfarwyddwr a Chyd-sylfaenydd Connect Meet Educate (CME), y graddedigion Hana Hutton (BSc 2025) a Natalia Trunks (BSc 2024) yn dilyn eu profiad gwaith fel cynorthwywyr digwyddiadau.

Ers hynny, mae’r ddau gyn-fyfyriwr wedi mynd ymlaen i gefnogi myfyrwyr profiad gwaith pellach fel rhan o’u rolau proffesiynol. Eglurodd: “Mae ein profiad yn CME wedi bod yn un cadarnhaol – rydym wedi cael pedwar myfyriwr ar leoliad gyda ni dros y ddwy flynedd ddiwethaf, ac mae tri ohonynt wedi mynd ymlaen i gael rolau parhaol gyda ni. Mae cynnig profiad gwaith fel busnes bach yn eich galluogi chi i elwa ar bobl ifanc dalentog a all wella eich busnes trwy eu dealltwriaeth o dueddiadau a’u parodrwydd i ddysgu systemau a thechnolegau newydd.”

Mae’r cylch ymgysylltu rhwng cyn-fyfyrwyr a myfyrwyr yn tynnu sylw at fuddion cydfuddiannol profiad gwaith: mae myfyrwyr yn cael amlygiad ystyrlon i’r diwydiant, tra bod sefydliadau’n datblygu llif o raddedigion talentog sydd eisoes yn deall eu busnes a’u diwylliant.

Bellach wedi hen ennill eu plwyf yn eu gyrfaoedd, mae Tony, Hana, Natalia a chyn-fyfyrwyr eraill mewn sefyllfa dda i helpu myfyrwyr y dyfodol gyda’u datblygiad proffesiynol a sicrhau bod y cyfle i ennill profiad gwaith yn cael ei gynnal yn eu sefydliad.

I unrhyw sefydliadau lleol sydd â diddordeb mewn cynnig interniaeth, cysylltwch â’r tîm Profiad Gwaith ar [email protected].