Sut i osgoi gorflino – Bossing It

Yn y byd proffesiynol heddiw, gall y pwysau i berfformio deimlo’n ddi-baid, ond ni ddylai llwyddo ddod ar draul eich lles. P’un a ydych chi’n dringo’r ysgol gorfforaethol neu’n ceisio dod o hyd i gydbwysedd da rhwng bywyd a gwaith, mae dysgu sut i amddiffyn eich egni a’ch iechyd meddwl yn allweddol er mwyn i chi ffynnu – nid goroesi yn unig – yn y gwaith. Gwnaethon ni siarad â rhai o’n cymuned o gyn-fyfyrwyr anhygoel sydd wedi cynnig eu safbwyntiau ar sut i osgoi gorflino yn y gweithle.

Togzhan Talibayeva (BSc 2017, MSc 2018)

Mae Togzhan yn Rheolwr Marchnata Digidol yng nghwmni Gridlines, gwasanaeth ymgynghori modelu ariannol byd-eang. Mae hi’n arbenigo ym maes strategaeth, cynnwys, a marchnata ar sail perfformiad gyda ffocws ar dwf sy’n cael ei arwain gan ddata.

Ar ôl cwblhau ei gradd israddedig a’i gradd meistr ym Mhrifysgol Caerdydd, datblygodd ei gyrfa ym maes y gwasanaethau proffesiynol. Mae gan Togzhan ddiddordeb penodol yn y cysylltiad rhwng marchnata, gwerthu a systemau gyda ffocws hirdymor ar weithrediadau refeniw, technoleg marchnata, a dod o hyd i adnoddau sy’n helpu i wneud timau yn fwy cynhyrchiol ac effeithiol yn fasnachol.

Gosodwch eich ffiniau eich hun

Nid yw gorludded yn golygu gweithio gormod yn unig. Mae’n ymwneud â gweithio heb gael y cyfle i gamu’n ôl neu weld y darlun ehangach. O ran marchnata digidol mae yna wastad ymgyrch arall i’w haddasu, neu adroddiad arall i’w ddadansoddi. Rwy wedi dysgu i fod yn agored am fy llwyth gwaith ac i dynnu sylw at bethau’n gynnar os ydyn nhw’n mynd yn ormod. Mae hefyd yn helpu’r tîm i gynllunio’n well.

Rwy’n neilltuo amser i ganolbwyntio ar waith pwysig heb unrhyw ymyriadau. Rwy’n dewis peidio mynd i gyfarfodydd lle nad oes angen i mi gyfrannu ac yn defnyddio hidlydd effaith-ymdrech cyflym i ganolbwyntio ar beth sydd wir yn gwneud gwahaniaeth. Gan amlaf, rwy’n anelu at gyflawni tri pheth pwysig y dydd. Rydyn ni hefyd yn agored am faint o waith sydd gennym ni er mwyn gwneud yn siŵr bod neb yn dioddef mewn tawelwch.

Rwy’n gosod nodau sy’n fy ysbrydoli i ac yn rhoi egni i mi, a chanolbwyntio ar ble rwy eisiau mynd a phwy rwy eisiau bod. Mae hynny’n fy helpu i ganolbwyntio. Ac rwy’n ceisio bod yn garedig gyda fy hun. Mae rhai diwrnodau’n wych, a rhai ddim. Mae hynny’n iawn.

Ar lefel bersonol? Rwy’n ceisio peidio â dechrau fy niwrnod yn gweithio. Rwy’n deffro ac yn mynd am dro, i’r gampfa, neu i ddarllen llyfr. Pan rwy’n gwneud hynny, mae’n newid naws popeth.

Shelley Pascual (MA 2017)

Mae Shelley yn Uwch Arbenigwr Cyfathrebu gyda chwmni Siemens Healthineers, gyda dros ddegawd o brofiad rhyngwladol mewn busnesau newydd a chorfforaethau. Yn gyn-newyddiadurwr, mae hi’n mwynhau llunio straeon a chynnwys sy’n helpu pobl yn y pen draw.

Y tu allan i’r gwaith, mae hi wrth ei bodd yn gweld y byd gyda’i theulu, mynd ar anturiaethau dyddiol gyda’i phlentyn bach, pobi, a herio ei hun i roi cynnig ar bethau newydd – o sgïo i ddysgu Eidaleg.

Cymryd rhan mewn gweithgareddau i ddadflino

Ar ôl dod yn agos at orweithio ychydig o weithiau, rwy wedi dysgu blaenoriaethu gweithgareddau sy’n fy helpu i ddadflino, megis ysgrifennu mewn dyddiadur wrth fwyta brecwast, gwneud Pilates yn ystod amser egwyl a chael sgyrsiau rhithwir ysbrydoledig gyda chydweithwyr wrth gerdded yn yr awyr agored.

Dros y blynyddoedd diwethaf, rwy wedi dysgu sefydlu ffiniau iach trwy therapi. Mae hyn yn cynnwys cadw at amseroedd penodol ar gyfer cau fy ngliniadur ar ddiwedd y dydd, yn enwedig yn ystod cyfnodau prysur. Mae fy therapydd hefyd wedi pwysleisio pwysigrwydd cymryd rhan mewn hobïau. Mae cymryd rhan mewn prosiectau ysgrifennu ystyrlon wedi caniatáu i mi ddod o hyd i gydbwysedd a chyflawniad gan fy atgoffa mai dim ond un agwedd ar fy mywyd yw fy ngyrfa.

Liz Cochlin (BA 2000)

Mae Liz (hi) yn arweinydd technoleg medrus sydd â hanes diamheuol o ysgogi trawsnewidiadau digidol ar raddfeydd mawr a meithrin timau sy’n rhagori. A hithau wedi ennill y wobr CIO 100 fawreddog yn 2024, mae gan Liz brofiad helaeth ym maes Gweithrediadau TG, Seiberddiogelwch, Pensaernïaeth TG, a Rheoli Prosiectau. Mae hi’n eiriolwr cryf dros les yn y gweithle, yn angerddol am wella prosesau, chwalu rhwystrau, a chreu amgylcheddau lle gall unigolion ffynnu. Mae Liz yn mynd ati’n rhagweithiol i fentora yng nghymuned Menywod ym maes Technoleg ac mae wedi ymrwymo i addysgu ymwybyddiaeth ofalgar yn y gweithle a thu hwnt. Ar hyn o bryd, mae hi’n arwain gwasanaethau technoleg English Heritage, lle mae’n llywio proses trawsnewid digidol cyffrous, ac yn aelod o fwrdd Academi Gwyddor Data Prifysgol Caerdydd.

Ystyriwch wneud pethau’n raddol

Mae gorflino’n rhywbeth rwy wedi’i brofi fwy nag unwaith yn fy ngyrfa ac un o’r technegau rwy wedi dysgu amdani yw gwneud pethau’n raddol. Mae’n hawdd mynd i batrwm ‘ffynnu a methu’ lle byddwn ni’n gorweithio am gyfnodau ac yna’n curo wal, gan deimlo ein bod wedi’n llethu a bod y tanc yn wag. Ceisiwch ddod yn fwy ymwybodol o’r egni sydd gennych chi a sut mae’n amrywio trwy gydol y dydd, yr wythnos a’r mis. Sylwch ar y gweithgareddau sy’n rhoi hwb i’ch egni a’r rhai sy’n eich blino. Yna daw hi’n haws cynllunio amserlen realistig sy’n gynaliadwy i chi a’ch anghenion unigol.

Yn barod i gysylltu â chyn-fyfyrwyr eraill o Brifysgol Caerdydd? Ymunwch â’n grŵp LinkedIn a dechrau rhwydweithio.