Sut i gael cyfweliad – Bossing It

Wrth gystadlu â llawer o ymgeiswyr, gall sicrhau cyfweliad swydd deimlo fel tasg anodd. Yn ein crynodeb diweddaraf o gyngor i gyn-fyfyrwyr, gofynnwyd i’r arbenigwyr Jasper, Parves, Yvonne, a David am eu hawgrymiadau defnyddiol ar gyfer llunio cais cryf.

Jasper Wilkins (BA 2017)

Uwch-gynhyrchydd yn y BBC yw Jasper, gan arwain ar greu cynnwys digidol i sioeau blaenllaw fel Gladiators, The Apprentice, ac Eurovision. Yn y gorffennol, mae wedi golygu rhagluniau ffilmiau i’r BFI a BAFTA, ac wedi tynnu lluniau artistiaid gan gynnwys Stormzy, Slayer a The 1975. Mae ei gydnabyddiaeth gan y diwydiant yn cynnwys cael ei enwi’n un o’r 30 enillydd dan 30 oed Media Week, enillydd Promax Gold ac enillydd gwobr Broadcast Digital.

Dangos y gorau o’ch talentau

Os ydych chi’n gwneud cais am swydd cynnwys creadigol, y darn cyntaf o’ch gwaith gweledol y bydd eich darpar gyflogwr yn ei weld yw eich CV neu’ch llythyr eglurhaol. Os yw eich CV yn llifo’n dda ac yn hawdd i’w ddeall, yna mae’n arwydd da cynnar bod gennych chi ymennydd da i greu cynnwys. Cadwch bopeth yn fyr ac yn berthnasol, gan ddefnyddio e-bost proffesiynol, rhestrwch yr hyn rydych chi wedi’i gyflawni a chofiwch fod fformatio cyson yn mynd yn bell.

A ninnau’n rheolwyr cyflogi, rydyn ni hefyd eisiau gweld rhywfaint o gynnwys rydych chi wedi’i gynhyrchu! Mae hyn yn ymddangos yn amlwg, ond bydd nifer fawr o ymgeiswyr heb gynnwys samplau o’u gwaith yn eu cais, gan ddisgrifio eu sgiliau yn unig yn hytrach na’u dangos. Yn lle hynny, ystyriwch gynnwys dolen i bortffolio gyda chyd-destun y prosiectau a’r rolau penodol a oedd gennych chi.

Dr Parves Khan (BScEcon 1992)

Parves yw Prif Swyddog Gweithredu Hiyacar, darparwr gwasanaethau a thechnoleg rhannu ceir. Mae hi hefyd yn awdur ac yn areithiwr ar dechnoleg/ deallusrwydd artiffisial, sgiliau ac arweinyddiaeth gynhwysol.

Ar ôl astudio Gwleidyddiaeth ym Mhrifysgol Caerdydd, aeth ymlaen i gwblhau PhD ym Mhrifysgol Bryste yn 1996. Yna sefydlodd yrfa yn arwain adrannau data a manylion defnyddwyr i sefydliadau ar draws sawl sector, gan gynnwys twristiaeth, yswiriant, technoleg, a’r cyfryngau. Gallwch chi gael rhagor o wybodaeth am ei gwaith yma.

Trechwch yr algorithm deallusrwydd artiffisial

Gwnewch eich gwaith cartref! Mae hyn yn golygu adolygu’r disgrifiad swydd yn ofalus a gwneud yn siŵr bod eich cais yn cyfateb yn agos i sgiliau a chyfrifoldebau’r rôl.
Y dyddiau hyn, gallai eich cais gynnwys CV yn unig, CV gyda llythyr eglurhaol, atebion i gyfres o gwestiynau sy’n seiliedig ar gymwyseddau, neu bob un o’r rhain. Peidiwch byth ag anfon CV, llythyr eglurhaol nac atebion cyffredinol. Gyda’r defnydd cynyddol o blatfformau llogi algorithm deallusrwydd artiffisial, mae’n debyg y bydd eich cais yn cael ei ddileu’n syth.

David Jones (BA 1983)

David yw Cadeirydd yr Asiantaeth Trwyddedu Gyrru a Cherbydau (DVLA) a Chyfarwyddwr Anweithredol Ofwat. Ei brif feysydd arbenigedd yw seiberddiogelwch ac effaith economaidd technoleg.

Cyn hynny, bu David yn Brif Swyddog Technoleg ar gyfer cwmni awyrennau Ewropeaidd a grŵp hamdden mawr, a threuliodd ddegawd yn angel buddsoddi, ymgynghorydd, a mentor i sawl busnes ym maes technoleg. Cafodd ei benodi hefyd yn Gyfarwyddwr Anweithredol ar ddau fwrdd iechyd mawr yng Nghymru, ac roedd yn gyfrifol am gyllideb flynyddol gwerth dros £1 biliwn.

Mae sgiliau trosglwyddadwy yn hanfodol

Mae sawl blwyddyn wedi mynd heibio ers i fi astudio fy ngradd mewn Athroniaeth, ac rwy’n credu’n gryf bod yr hyn a ddysgais yn ystod y blynyddoedd hynny’n dal i fod yn berthnasol i’m gwaith ym maes llywodraethu a her. Mae’r gystadleuaeth am swyddi (yn enwedig ar ôl graddio) bellach mor ddwys, mae sgiliau trosglwyddadwy yn dod yn berthnasol bron ym mhobman. Pan fyddwch chi hefyd yn ystyried y newid yn natur cyflogaeth (megis cyflwyniad ChatGPT), mae’r ansefydlogrwydd yn ddifrifol.

Dydy ymgeisio am swydd ddim yn ymwneud â dangos sut mae eich gradd yn berthnasol i swydd benodol yn unig, ond yn hytrach rhaid dangos tystiolaeth o’ch canfyddiad, meddylfryd dadansoddol, a meddwl creadigol – ac mae hynny yr un mor bosibl gyda BSc mewn Cemeg â gradd BA mewn Hanes. Waeth beth fo’ch cefndir, dangoswch eich bod yn graff ac eich bod yn mynd ati i gyflawni tasgau. Mewn geiriau eraill, ewch ati i ymdrin â sefyllfaoedd yn eich ffordd unigryw eich hun a dangos eich gallu i weithio’n gyflym.

Yn barod i gysylltu â chyn-fyfyrwyr eraill o Brifysgol Caerdydd? Ymunwch â’n grŵp LinkedIn a dechrau rhwydweithio.