Drwy dderbyn myfyriwr yn intern, roedd pawb ar eu hennill!

Y cyn-fyfyriwr Dr Mark Davies (BEng 1994, PhD 1999) yw Cyfarwyddwr Trosglwyddo a Dosbarthu Pŵer y DU yn RINA – cwmni byd-eang sy’n cynnig datrysiadau profi, archwilio, ardystio a pheirianneg. Yn 2024, derbyniodd ef a’i gwmni fyfyriwr o Brifysgol Caerdydd yn intern am saith wythnos dros yr haf, gan ei helpu i fagu profiad, datblygu sgiliau a pharatoi ar gyfer byd gwaith.

Roedd Harvy Davies (Peirianneg Drydanol ac Electronig 2024-) yn teimlo bod y lleoliad gwaith yn ddefnyddiol oherwydd ei fod yn gyfle iddo gael profiad ymarferol wrth astudio, gan gynnwys gwella ei CV.

“Gweithiais i ar brosiect yn ystod y lleoliad gwaith, ac uchafbwynt oedd gweld peirianwyr RINA yn ei ddefnyddio’n llwyddiannus ar safle.

Mae’r farchnad swyddi’n hynod gystadleuol y dyddiau ‘ma, ac mae’r interniaeth hon wedi fy rhoi mewn sefyllfa dda iawn. Mae gallu nodi’r profiad hwnnw ar fy CV yn amhrisiadwy. Mae’r profiad hefyd wedi rhoi gwir hwb i fy hyder.”

Dywedodd Mark, a astudiodd Beirianneg Drydanol ac Electronig ei hun ym Mhrifysgol Caerdydd: “Uchafbwynt cynnig lleoliad gwaith i fyfyriwr oedd cael unigolyn galluog a brwdfrydig oedd yn gallu canolbwyntio’n llwyr ar brosiect. Oherwydd hynny, roedd modd symud y gwaith yn ei flaen yn llawer cyflymach.

Roedd yr interniaeth yn ffordd wych i RINA ddatblygu prosiect arloesi a allai fod wedi’i roi o’r neilltu fel arall oherwydd pwysau amser. Mae hefyd wedi rhoi cyfle i Harvy gael profiad gwerthfawr a datblygu i ategu ei astudiaethau academaidd, a fydd yn gwella ei gyflogadwyedd, gobeithio. Mae pawb ar eu hennill!”

Daeth y lleoliad gwaith i ben ar ôl saith wythnos, ond mae Mark a’i gwmni, a oedd mor falch o waith Harvy, wedi cyflogi Harvy yn rhan-amser ers hynny er mwyn iddo barhau â’i waith ar y prosiect o amgylch ei astudiaethau.

Dim ond un o nifer o gyn-fyfyrwyr sydd wedi helpu myfyrwyr presennol Prifysgol Caerdydd i gael profiad gwaith drwy interniaeth yw Mark. Mae Tîm Profiad Gwaith y Brifysgol yn chwilio am gyn-fyfyrwyr a hoffai gynnig interniaeth yr haf hwn i fyfyriwr neu fyfyriwr graddedig. Darganfod mwy am y cymorth y gallant ei gynnig.

Mae croeso i chi hefyd gysylltu â’r Tîm Profiad Gwaith ar LinkedIn i gael y wybodaeth ddiweddaraf am ei gynlluniau a’i gyfleoedd.