Gwneud ffurflenni yn hygyrch

Ysgrifennwyd y blog hwn gan Heather Pennington ac Alex Stewart o’r Academi Dysgu ac Addysgu.

Mae ffurflenni ym mhobman ym mywyd prifysgol – arolygon adborth, cofrestru ar gyfer digwyddiadau, cyflwyniadau asesiadau, cofnodion mentora, a phopeth yn y canol. Ond gall ffurflenni sydd wedi’u cynllunio’n wael greu rhwystrau go iawn, yn enwedig i bobl sy’n defnyddio rhaglenni darllen sgrîn neu sy’n llywio’r bysellfwrdd.

Mae creu ffurflenni hygyrch yn ofyniad cyfreithiol o dan Ddeddf Cydraddoldeb 2010, ond mae hefyd yn ffordd syml o wneud bywyd yn haws i gydweithwyr a myfyrwyr.

Isod mae awgrymiadau cyflym, ymarferol y gallwch chi eu rhoi ar waith ar unwaith.

Pam mae ffurflenni hygyrch yn bwysig 

Mae ffurflenni hygyrch yn golygu y gall pawb eu llenwi’n annibynnol – dim atebion dros dro, dim angen gofyn am help, dim ymatebion ar goll. Er y gall rhai addasiadau ymddangos yn fach, gallan nhw wella’r profiad yn sylweddol i ddefnyddwyr sy’n dibynnu ar raglenni darllen sgrîn, llywio’r bysellfwrdd, neu offer cynorthwyol eraill.

Pum ffordd gyflym o wella hygyrchedd ffurflenni  

1. Defnyddiwch labeli clir, disgrifiadol 

Mae labeli yn helpu pawb, ond maen nhw’n hanfodol i’r rhai sy’n defnyddio rhaglenni darllen sgrîn.

• gwnewch yn siŵr bod gan bob maes label (nid testun dalfan yn unig)
• defnyddiwch nodweddion “label” mewnol mewn offer fel Microsoft Forms neu HTML (tagiau <label>)
• osgowch amwysedd – er enghraifft, dywedwch “Enw cyntaf” yn lle “Enw”

Trwsio’n gyflym: Gwiriwch eich bod chi’n gallu deall pwrpas pob maes heb glicio ynddo.

2. Rhowch gyfarwyddiadau syml, defnyddiol 

Cadwch gyfarwyddiadau yn agos at y maes perthnasol a defnyddiwch iaith glir.

• rhannwch esboniadau hirach yn gamau byr
• ar gyfer cwestiynau cymhleth, cofiwch gynnwys enghreifftiau byr

Trwsio’n gyflym: Os yw’n cymryd mwy nag ychydig eiliadau i ddeall beth i’w wneud, symleiddiwch ef.

3. Gwnewch negeseuon gwall yn ystyrlon 

Cefnogwch ddefnyddwyr i gywiro camgymeriadau yn hawdd.

• osgowch awgrymiadau amwys fel “Cofnod annilys”
• byddwch yn benodol: “Rhowch eich cyfeiriad e-bost yn y fformat [email protected].” 

Trwsio’n gyflym: Gwiriwch y ffurflen eich hun, a yw’r negeseuon gwall yn gwneud synnwyr heb esboniad ychwanegol?

4. Cadwch y strwythur yn rhesymegol ac yn hawdd i’w lywio 

Mae cynllun rhagweladwy o fudd i bawb.

• grwpio cwestiynau cysylltiedig gyda’i gilydd
• defnyddio penawdau i rannu ffurflenni hirach
• gwneud yn siŵr bod defnyddwyr yn gallu symud trwy’r ffurflen gan ddefnyddio’r bysellfwrdd yn unig (Tab, Shift+Tab).

Trwsio’n gyflym: Rhowch gynnig ar ddefnyddio’r allwedd Tab ar y bysellfwrdd i symud drwy’r ffurflen, a yw’n dilyn y drefn rydych chi’n ei disgwyl?

5. Defnyddiwch liw yn ddoeth 

Ni ddylai lliw yn unig gael ystyr.

• cyfunwch liw ag eiconau neu destun ar gyfer negeseuon gwall neu feysydd gofynnol
• gwnewch yn siŵr bod y cyferbyniad yn ddigon cryf i destun fod yn ddarllenadwy

Trwsio’n gyflym: Os byddwch chi’n tynnu’r holl liw i ffwrdd, a yw’r ystyr yn dal yn glir?

Mae dylunio ffurflenni hygyrch yn helpu i wneud cynnwys yn fwy deniadol a defnyddiol i ystod ehangach o ddysgwyr a chydweithwyr.

Angen help? 

Am fwy o awgrymiadau ar wella hygyrchedd, darllenwch y Canllaw Hygyrchedd Digidol heddiw a rhowch hygyrchedd a chynhwysiant wrth wraidd addysgu a dysgu eleni.

Cysylltwch â ni

Os hoffech chi gael rhagor o gymorth neu os oes gennych awgrymiadau ar gyfer pynciau blog yn y dyfodol, cysylltwch â’r Academi Dysgu ac Addysgu trwy [email protected].