Gwella Profiad y Myfyrwyr: Syniadau gan Brosiect Gwella Panopto

Ysgrifennwyd gan Jordan Lloyd, Dylunydd Dysgu yn Nhîm Addysg Ddigidol yr Academi Dysgu ac Addysgu.

Mae recordio darlithoedd a dysgu sy’n seiliedig ar fideos yn chwarae rôl ganolog wrth gefnogi astudio hyblyg a chynhwysol ym mhob rhan o faes addysg uwch. Ym Mhrifysgol Caerdydd, defnyddir Panopto yn eang i gynnig recordiadau o ddarlithoedd, deunyddiau dysgu ategol a chyflwyniadau asesu fideo. Er bod myfyrwyr yn gwerthfawrogi’r platfform, mae adborth yn awgrymu bod eu profiadau o ddydd i ddydd yn aml yn amrywio’n sylweddol yn dibynnu ar y modiwl neu’r ysgol.

Er mwyn ystyried y profiadau hyn yn fanylach, arweiniodd rhaglen Partneriaid Profiad Myfyrwyr brosiect ymchwil wedi’i ysgogi gan fyfyrwyr. Drwy gyfuno dadansoddiad o ddata arolygon, arolwg myfyrwyr pwrpasol, a thrafodaethau grŵp ffocws, nod y prosiect oedd casglu argymhellion yn seiliedig ar dystiolaeth i lunio canllawiau staff ac adnoddau cymorth i fyfyrwyr ar sail llais y myfyrwyr yn uniongyrchol.

Mae’r canfyddiadau hyn yn dangos bod Panopto wedi datblygu o fod yn offeryn atodol i fod yn adnodd hanfodol ar gyfer dysgu. Mae myfyrwyr yn dibynnu ar recordiadau i gadarnhau dealltwriaeth, adolygu ar gyfer arholiadau, a dal i fyny pan fyddan nhw’n sâl. Fodd bynnag, mae heriau allweddol megis arferion recordio anghyson, oedi wrth uwchlwytho, ffolderi sy’n anodd eu defnyddio, a phryder ynghylch asesu yn aml yn effeithio ar brofiad y defnyddiwr.

Oeddech chi’n gwybod?

Un o’r themâu mwyaf a nodwyd gan fyfyrwyr oedd effaith amseroedd uwchlwytho a threfniadaeth fideos ar eu harferion astudio. Mae’r rhan fwyaf o fyfyrwyr yn credu bod uwchlwythiadau ar yr un diwrnod yn ddelfrydol ac yn dderbyniol o fewn 24–48 awr, ond mae oedi y tu hwnt i dri diwrnod yn tarfu ar eu cynlluniau adolygu ac yn ei gwneud hi’n anoddach dal i fyny.

Ar ben hynny, mae recordiadau sydd â dyddiadau’n unig yn eu teitlau neu rai sydd wedi’u cuddio mewn strwythurau ffolderi yn golygu bod myfyrwyr yn aml yn treulio mwy o amser yn chwilio am ddarlith nag yn ei gwylio. Mae arferion syml, megis gosod recordiadau wrth ymyl sleidiau modiwl ar Dysgu Canolog a defnyddio confensiynau enwi clir, yn cael effaith gadarnhaol ar ymgysylltiad myfyrwyr yn syth.

Blaenoriaethau myfyrwyr

Dysgwch beth mae myfyrwyr yn eu hystyried yn brif flaenoriaethau ar gyfer gwella eu profiad o Panopto

Pa gamau allwch chi eu cymryd?

• Ymgorffori cynnwys yn uniongyrchol mewn modiwlau: Rhowch recordiadau Panopto yn uniongyrchol ar dudalennau modiwl Dysgu Canolog wrth ymyl sleidiau ac adnoddau perthnasol, yn hytrach na’u gadael mewn ffolderi allanol ar wahân.
• Defnyddiwch deitlau clir a phriodol: Yn lle teitlau sy’n cynnwys y dyddiad yn unig, defnyddiwch bynciau disgrifiadol, fel y gall myfyrwyr ddod o hyd i gynnwys darlithoedd penodol yn gyflym.
• Ceisiwch uwchlwytho’n amserol: Dylech chi ymdrechu i gyhoeddi recordiadau rhwng 24 a 48 awr ar ôl y sesiwn fyw er mwyn cadw myfyrwyr ar y trywydd iawn gyda gweithgareddau dysgu dilynol.
• Blaenoriaethwch ansawdd y sain: Sicrhewch fod meicroffonau wedi’u gosod yn gywir, gan fod sain glir yn hanfodol ar gyfer dealltwriaeth myfyrwyr a chysondeb capsiynau awtomatig.
• Tawelwch feddwl y myfyrwyr ynghylch cyflwyniadau fideo: Ceisiwch gynnig canllawiau neu ddisgwyliadau clir ynghylch yr hyn y dylai myfyrwyr ei ddisgwyl pan fyddan nhw’n cyflwyno asesiadau fideo drwy Panopto er mwyn lleihau pryder o ran cyflwyno.

Nid bwriad gwella’r profiad yn Panopto yw ailwampio’r ffordd rydyn ni’n dysgu, ond creu arferion cyson a dibynadwy sy’n cefnogi pob dysgwr yn deg. Pan gaiff recordiadau eu huwchlwytho’n brydlon, eu henwi’n glir a’u gwneud yn hawdd i’w canfod, gall myfyrwyr ganolbwyntio ar yr hyn sy’n bwysicaf: sef, meistroli eu pwnc.

Cysylltwch â ni

Hoffech chi drafod recordio darlithoedd, canllawiau Panopto, neu strategaeth addysg ddigidol ymhellach? Mae’r Academi Dysgu ac Addysgu yma i helpu, felly cysylltwch â ni! [email protected]