Ailgysylltu â’r gymuned ymchwil: sut y gwnaeth Ysgol Haf Wolfson roi persbectif newydd i mi

Yn y blog hwn mae Ella Watson, myfyrwraig PhD ym Mhrifysgol Caerdydd, yn myfyrio ar sut wnaeth mynd i Ysgol Haf Wolfson 2026 ei helpu i sylweddoli mai’r ffordd orau o symud eich ymchwil ymlaen, ambell waith, yw cymryd cam yn ôl.

Mae gwneud PhD yn gyfle anhygoel, ond gall hefyd wneud i’ch byd deimlo’n rhyfedd o fach. Gall treulio bron bob dydd yn ymgolli yn eich prosiect ei gwneud hi’n hawdd colli golwg ar yr ymdrech ymchwil ehangach a’r gymuned o ymchwilwyr, ymarferwyr a gweithwyr proffesiynol sy’n gweithio tuag at y nod cyffredin o wella dealltwriaeth o iechyd meddwl plant a phobl ifanc. Drwy fynd i Ysgol Haf Wolfson, cefais newid persbectif nad oeddwn i’n gwybod fy mod ei angen.

Dros ychydig ddyddiau, cefais gyfle i gamu i ffwrdd o fy ymchwil fy hun ac ymgysylltu â grŵp ysbrydoledig o fyfyrwyr, academyddion a gweithwyr proffesiynol o bob cwr o’r DU a ledled y byd. Roedd sgyrsiau a chyfleoedd i gysylltu’r un mor werthfawr â rhaglen y darlithoedd. Roedd y sgyrsiau’n canolbwyntio ar y profiad rydyn ni’n ei rannu, yr heriau rydyn ni’n eu hwynebu, ac yn cynnig rhywfaint o gipolwg unigryw ar y gwahanol lwybrau sydd wedi dod â phobl i mewn i ymchwil. Roedd yn ein hatgoffa, er y gallai ein prosiectau fod yn wahanol, ein bod ni i gyd yn gweithio tuag at yr un pwrpas cyffredin.

Fel rhywun sy’n gweithio ar ddata gweinyddol cysylltiedig, roedd yn ddiddorol iawn clywed am ehangder yr ymchwil sy’n cael ei chynnal. Roeddwn i’n teimlo bod y sesiynau niwrowyddoniaeth yn arbennig o ddiddorol, ac yn cynnig cipolwg ar ddisgyblaeth nad oes gen i fawr ddim profiad uniongyrchol ohoni, ond un sy’n rhannu llawer o nodau cyffredin. Roedd hi’n braf cael edrych y tu hwnt i faes arbenigedd fy hun a chael fy atgoffa o ba mor gysylltiedig yw gwahanol feysydd ymchwil mewn gwirionedd. Uchafbwynt arall o’r rhaglen i mi oedd y sesiwn grŵp bach yn y prynhawn a oedd yn trin a thrafod opsiynau cyllid ôl-ddoethuriaeth.

Er gwaethaf amrywiaeth y pynciau a drafodwyd, roedd hefyd yn hynod werthfawr clywed fy maes ymchwil fy hun yn cael ei gydnabod drwy gydol y rhaglen. Fe wnaeth clywed trafodaeth am ddefnyddio data cysylltiedig atgyfnerthu fy ngwerthfawrogiad o bwysigrwydd y gwaith sy’n cael ei wneud yn y maes hwn. Roedd yn atgof boddhaol bod y cwestiynau rwy’n ystyried yn fy ymchwil gyfredol yn cyfrannu at sgyrsiau llawer ehangach sy’n digwydd ar draws y maes, a bod gan yr ymchwil hon y potensial i gyfrannu at newid ystyrlon.

Gwnaeth Ysgol Haf Wolfson i mi deimlo’n fwy cysylltiedig, yn fwy chwilfrydig ac yn fwy brwdfrydig nag erioed. Fe wnaeth fy atgoffa, er y gall PhD weithiau deimlo fel ymdrech unigol, ei fod hefyd yn rhan o ymdrech gydweithredol lawer ehangach. Roedd camu y tu hwnt i fy mhrosiect fy hun, cwrdd â chydweithwyr o bob cwr o’r byd a darganfod safbwyntiau newydd yn ysbrydoliaeth ar gyfer fy ymchwil, a chefais hyder o’r newydd yng ngwerth y gwaith rwy’n gobeithio ei gyfrannu. Yn bwysicaf oll, fe wnaeth fy atgoffa pam y dechreuais yr ymchwil hon yn y lle cyntaf.

Cysylltwch â fi:

LinkedIn

[email protected]

Diolch yn fawr iawn i Ella am rannu ei phrofiad gyda ni.