Gŵyl sy’n addas i bob menyw

Yn Medicentre Caerdydd, rydyn ni’n falch o gefnogi a dathlu’r bobl sy’n gweithio yn ein hadeilad, yn enwedig pan fydd eu gwaith yn gwneud gwahaniaeth gwirioneddol i fywydau pobl. Mae Gŵyl Everywoman yn enghraifft berffaith; y mis hwn, fe wnaethon nhw ddathlu eu trydedd flwyddyn gyda diwrnod ysbrydoledig o ddysgu, cyfeillgarwch a hwyl.

Cafodd Gŵyl Everywoman ei sefydlu gan Julie Cornish mewn ymateb i’w rhwystredigaeth gyda pha mor aml y mae pryderon iechyd menywod yn cael eu diystyru neu eu bychanu. Mae’r digwyddiad wedi’i gynllunio i addysgu, grymuso a chefnogi menywod a merched drwy fynd i’r afael â meysydd gofal iechyd sy’n cael eu stigmateiddio neu eu camddeall yn rhy aml.

Eleni, daeth cannoedd o bobl i gymryd rhan yn yr ŵyl fywiog a chynhwysol hon ar 7 Mehefin yn yr hyfryd Cwrt Insole yng Nghaerdydd, yn awyddus i ddysgu a dweud wrth eraill amdano.

Roedd y diwrnod yn cynnwys cymysgedd ysbrydoledig o siaradwyr, arweinwyr gweithdai ac ymarferwyr lles. Ymhlith y cyfoeth o wybodaeth a phynciau a drafodwyd, cafodd y rhai a oedd yn bresennol gyfle i ddysgu am feysydd megis:

• Genedigaeth a magu plant
• Menopos a pherimenopos
• Goroesi canser
• Iechyd atgenhedlu a meddyliol

Ochr yn ochr â’r cyflwyniadau a’r trafodaethau panel, roedd yna hefyd amrywiaeth o grwpiau cymorth galw heibio, perfformiadau a stondinau elusennol.

Roedd y diwrnod hefyd yn cynnwys rhaglen amrywiol o weithgareddau: o ioga a Pilates i folddawnsio, arddangosiadau ar sut i godi pwysau, digwyddiad llofnodi llyfrau, a hyd yn oed sba dros dro gan LUSH. Gyda bwyd a diod, a nwyddau am ddim ar gael hefyd, roedd yr ŵyl yn arddangos dull gwirioneddol gyfannol o ymdrin ag iechyd menywod – gan gyfuno addysg, cymuned a hunanofal.

Ymhlith y rhai a fynychodd yr ŵyl roedd rhai o staff Medicentre ein hunain, a oedd yn meddwl ei fod yn gyfle gwych i ddysgu rhywbeth newydd, cysylltu ag eraill yn yr adeilad, a chymryd rhan mewn digwyddiadau i denantiaid.

Esboniodd Sammy, goruchwyliwr ein canolfan:

“O sgwrsio â’r mynychwyr i gymryd rhan mewn gweithgareddau, roedd yn ffordd hwyliog a diddorol i’n staff gefnogi a bod yn rhan o’r hyn sy’n digwydd yn Medicentre.”

Ac nid dim ond yr unigolion a gymerodd ran yn yr ŵyl wnaeth elwa o’r profiad. Dywedodd Natalia, Cydlynydd Digwyddiadau Gŵyl Everywoman:

“Roedd yn hyfryd bod mewn awyrgylch a oedd yn dathlu ein hiechyd a’n lles heb unrhyw stigma, ac fe wnes i adael yr ŵyl yn teimlo’n gryf ac yn hyderus yn fy iechyd.”  

Mae llwyddiant cynyddol Gŵyl Everywoman yn dangos sut y gall arloesedd sy’n cael ei ysgogi gan y gymuned arwain at newid go iawn. Mae’r tîm yn gwella ymwybyddiaeth ac addysg ynghylch iechyd menywod drwy greu gofod cefnogol a chydweithredol. Mae’r teimlad hwn yn cael ei ategu gan Gyfarwyddwr Gwerthu a Digwyddiadau’r cwmni, Arwen:

“Y rhan fwyaf gwerth chweil ohono i mi yw gweithio gyda’r tîm digwyddiadau a’r menywod mwyaf anhygoel, a chwrdd â chymaint o fenywod ysbrydoledig ym maes iechyd menywod.”

Yn Medicentre Caerdydd, rydyn ni’n cefnogi arloeswyr uchelgeisiol ar draws meysydd gwyddorau bywyd a gofal iechyd, ac mae Gŵyl Everywoman yn enghraifft wych o sut y gall yr arloesi hwnnw sefydlu ei hun a ffynnu mewn ffyrdd arwyddocaol. Rydyn ni’n falch o gefnogi eu hymdrechion ac yn awyddus i weld sut mae’r wŷl yn parhau i dyfu.

I gael rhagor o wybodaeth am Ŵyl Everywoman, ewch i https://www.everywomanfest.com/