Skip to main content

Cyswllt Caerdydd, Newyddion

Cyfres deledu gyda Phrifysgol Caerdydd yn chwarae prif ran ynddi i’w gwylio pan fyddwch wedi diflasu

25 Mawrth 2020
Kate Morgan (BA 2017)

Kate Morgan (BA 2017)

Sownd yn y tŷ? Wedi cael digon ar ddiflastod? Neu yn ysu am ychydig o atgofion sy’n ymwneud â’r brifysgol? Rydym wedi gwneud rhestr o gyfresi teledu sydd wedi’u ffilmio yn ac o gwmpas adeiladau cofiadwy Prifysgol Caerdydd.

Doctor Who

Mae’r rhaglen ffuglen wyddonol adnabyddus hon yn cael ei chynhyrchu gan y BBC ac wedi bod o gwmpas ers 1963, ond cafodd ei hail-lansio yn 2005 gan BBC Cymru Wales. Bydd y rhan fwyaf o fyfyrwyr a chynfyfyrwyr Caerdydd yn ymwybodol o’i chysylltiadau â’n campws a’r llu o olygfeydd a gafodd eu ffilmio ar dir y Brifysgol. Os ydych yn effro, byddwch yn sylwi ar lu o leoliadau sy’n adnabyddus i chi (yn enwedig yng nghyfres deg).

Mae’n sicr yn sioe i basio’r amser os oes gennych ddiddordeb mewn teithio yn ôl ac ymlaen mewn amser, y gofod a hiwmor Prydeinig.

Gallwch ddod o hyd iddi ar Britbox a BBC iPlayer.

Sherlock

Yn seiliedig ar ‘Sherlock Holmes’ Syr Arthur Conan Doyle, mae’r gyfres dditectif hwyliog a gafaelgar hon yn gwneud defnydd o bensaernïaeth hardd Prifysgol Caerdydd. Mae’r Prif Adeilad ac Undeb y Myfyrwyr i’w gweld ynddi. Mae’r Amgueddfa Genedlaethol hefyd yn sleifio ei hun i mewn i’r sioe ar wahanol adegau.

Os ydych chi’n hoffi Benedict Cumberbatch a chyffro dirgelion llofruddio, ni chewch chi eich siomi.

Gallwch ddod o hyd iddi ar Netflix, BBC iPlayer ac Amazon Prime.

His Dark Materials

Llyfr arall sydd wedi’i addasu i fod yn gyfres deledu yw His Dark Materials. Mae Adeilad Morgannwg a’r Deml Heddwch yn serennu fel cefndir y ddrama ffantasi epig hon sy’n dod â chreadigaethau Phillip Pullman yn fyw. Mae lleoliadau eraill yng Nghaerdydd yn cael eu defnyddio a byddent o ddiddordeb i’r rheiny sydd wedi chwilota tu hwnt i waliau’r brifysgol.

Mae His Dark Materials yn sioe wych fydd yn anodd ei throi i ffwrdd, yn enwedig i ddilynwyr ffantasi.

Gallwch wylio hon ar BBC iPlayer ac Amazon Prime.

https://twitter.com/CardiffUniLib/status/1206615681376096257?s=20

Requiem

Yn gyfuniad perffaith o’r goruwchnaturiol a chyffro, mae Requiem yn gyfres chwe rhan gyda chast talentog a phlot fydd yn eich gwahodd i wylio’r chwe rhaglen un ar ôl y llall. Os nad ydych yn ymgolli gormod yn y stori fe wnewch sylwi ar ambell i leoliad cyfarwydd, ac efallai welwch chi’r campws mewn ffordd hollol wahanol wedyn.

Os ydych yn chwilio am rywbeth dwys, llesmeiriol a gafaelgar, dyma sioe i chi.

Gallwch ddod o hyd i’r gyfres oeraidd hon ar Netflix ac Amazon Prime.

Ysu am fwy o Gaerdydd?

Os nad yw’r uchod yn bodloni eich hiraeth neu os ydych wedi gwylio’r rhain yn barod, peidiwch â phoeni achos mae gennym ni fwy. Dyma restr o gyfresi teledu sydd wedi’u ffilmio yn y ddinas a’i chyffiniau:

Gavin and Stacey – Ynys y Barri a Chaerdydd
Pwy sydd ddim yn hoffi chwerthin? Mae Gavin and Stacey – hanes y cwpl o Ynys y Barri a’u teuluoedd yn sicr o godi gwên. Ar gael ar BBC iPlayer, Netflix, Youtube a Google Play.

Da Vinci’s Demons – Tongwynlais
Cyfres ffantasi hanesyddol sy’n gwneud y mwyaf o dirwedd tylwyth teg Tongwynlais. Ar gael ar Google Play, YouTube ac Amazon Prime.

Merlin – Tongwynlais
Drama ffantasi arall wedi’i ffilmio o gwmpas Tongwynlais ac, yn benodol, Castell Coch. Ar gael ar Netflix, Google Play ac YouTube.

Galavant – Castell Caerffili
Dyma sioe gerdd ffantasi Americanaidd fydd yn dod yn ffefryn yn syth. Bydd yn syndod faint fyddwch yn chwerthin. Ar gael ar Amazon Prime.

Being Human – Y Barri
Fe ddaeth y ddrama gomedi oruwchnaturiol hon ag ysbryd, bleidd-ddyn a fampir ynghyd fel cydletywyr, ac o gyfres 3 ymlaen, y Barri yw eu cartref. Ar gael ar Netflix

Torchwood – Caerdydd
Cafodd y ‘spin-off’ Doctor Who hwn ei anelu at gynulleidfa hŷn, ac mae’n dilyn tîm o helwyr estroniaid yn y ‘Torchwood Institute’ yng Nghaerdydd. Fe gafodd y sioe ddilyniad cwlt enfawr, i’r graddau fod cysegrfa i un o’r prif gymeriadau ym Mae Caerdydd hyd heddiw. Ar gael ar Amazon Prime.

Traitors – Cardiff
Cyfres fer llawn ysbïo, ffrwydradau a brad. Cafodd llawer o’r golygfeydd eu ffilmio yng Nghaerdydd ac mae un arbennig o gofiadwy yn cynnwys ffrwydrad bws ym Mae Caerdydd. Ar gael ar All 4 a Google Play.