{"id":6589,"date":"2026-09-11T15:18:07","date_gmt":"2026-09-11T14:18:07","guid":{"rendered":"https:\/\/blogs.cardiff.ac.uk\/LTAcademy\/?p=6589"},"modified":"2026-09-11T15:18:22","modified_gmt":"2026-09-11T14:18:22","slug":"fy-interniaeth-haf-gydar-academi-dysgu-ac-addysgu","status":"publish","type":"post","link":"https:\/\/blogs.cardiff.ac.uk\/LTAcademy\/cy\/fy-interniaeth-haf-gydar-academi-dysgu-ac-addysgu\/","title":{"rendered":"Fy Interniaeth Haf gyda’r Academi Dysgu ac Addysgu"},"content":{"rendered":"

Ysgrifennwyd gan Josh Done (myfyriwr Ffiseg yn yr ail flwyddyn) a Marianna Majzonova (Arbenigwr Addysg Ddigidol yr Academi Dysgu ac Addysgu).<\/p>\n

Myfyrdod Josh<\/h2>\n

Yr haf hwn, fe ges i\u2019r cyfle i weithio yn Intern Llythrennedd DA a Digidol yn yr Academi Dysgu ac Addysgu Prifysgol Caerdydd. Ar ddechrau\u2019r interniaeth, roedd gen i ddiddordeb mewn cael profiad o weithio mewn cyd-destun proffesiynol a datblygu sgiliau y gallwn i eu defnyddio y tu hwnt i fy ngradd. Yn ogystal \u00e2 hyn, ro\u2019n i’n awyddus i gyfrannu at sut mae\u2019r Brifysgol yn datblygu ac yn addasu canllawiau\u2019r Brifysgol ar Ddeallusrwydd Artiffisial (DA).<\/p>\n

Pan ddechreuais i\u2019r interniaeth, treuliais i amser yn dod i adnabod y t\u00eem a deall gwaith yr Academi Dysgu ac Addysgu. Ro\u2019n i\u2019n gallu ymgyfarwyddo \u00e2\u2019r prosiectau y byddwn i’n cyfrannu atyn nhw. Roedd cael y cyfle i gwrdd ag aelodau gwahanol o\u2019r t\u00eem a deall sut roedd eu rolau\u2019n cyd-fynd \u00e2\u2019i gilydd wedi fy helpu i gael dealltwriaeth lawer gwell o\u2019r gwaith sy\u2019n digwydd y tu \u00f4l i\u2019r llenni i gefnogi myfyrwyr a staff. Fe ges i\u2019r cyfle hefyd i weithio gyda Gwasanaethau\u2019r Llyfrgelloedd, a dynnodd sylw at natur ryngddisgyblaethol y gwaith, gan roi\u2019r cyfle imi gydweithio \u00e2 chydweithwyr o feysydd gwahanol ym Mhrifysgol Caerdydd.<\/p>\n

Un o’r pethau y gwnes i ei fwynhau fwyaf am yr interniaeth oedd yr amrywiaeth eang o waith ro\u2019n i\u2019n gallu cymryd rhan ynddo. Roedd rhan sylweddol o fy r\u00f4l yn canolbwyntio ar lythrennedd DA a digidol, gan gynnwys ymchwilio i sut mae myfyrwyr yn defnyddio DA ac ystyried sut mae modd i ganllawiau ac adnoddau helpu myfyrwyr i ddefnyddio’r offer hyn yn effeithiol ac yn gyfrifol. Bues i hefyd yn gweithio ar adnoddau i fyfyrwyr sy\u2019n ymdrin \u00e2 phynciau megis rheoli eich presenoldeb ar-lein a oedd yn cynnwys ystyried sut mae\u2019n bosibl cyflwyno gwybodaeth mewn ffordd glir, ddiddorol a hygyrch i fyfyrwyr.<\/p>\n

Roedd rhan sylweddol o fy interniaeth yn cynnwys datblygu adnoddau i fyfyrwyr sy\u2019n ymwneud \u00e2 DA ac asesu. Roedd hyn yn golygu meddwl yn ofalus am sut mae\u2019n bosibl cyfleu gwybodaeth yn glir i fyfyrwyr. Ochr yn ochr \u00e2 fy mhrif waith prosiect, ro\u2019n i hefyd wedi cefnogi ystod o dasgau yn \u00f4l yr angen ar gyfer yr Academi Dysgu ac Addysgu, gan gynnwys creu cynnwys fideo ar bynciau megis Panopto a dysgu cyfunol. Roedd amrywiaeth y tasgau hyn wedi rhoi profiad imi o addasu fy ffordd o gyfathrebu a gweithredu gan ddibynnu ar y pwnc a\u2019r gynulleidfa.<\/p>\n

Dyma oedd un o’r pethau mwyaf annisgwyl a ddysgais i yn ystod yr interniaeth. Cyn imi ddechrau\u2019r r\u00f4l hon, doeddwn i ddim wedi llawn sylweddoli faint o waith sydd ynghlwm wrth greu beth sydd ar y dechrau\u2019n gallu ymddangos fel canllawiau syml i fyfyrwyr. Bydd penderfyniadau bach yngl\u0177n \u00e2 therminoleg neu osodiad yn gwneud gwahaniaeth sylweddol i fyfyrwyr weithiau.<\/p>\n

Rwy hefyd o\u2019r farn fy mod i wedi datblygu’n bersonol drwy gydol yr interniaeth. Datblygais i fwy o hyder i weithio’n annibynnol ac fel rhan o d\u00eem, gan gymryd syniad cychwynnol a’i ddatblygu’n rhywbeth mwy cyflawn. Roedd cael adborth gan gydweithwyr ac addasu fy ngwaith yn rhan werthfawr arall o’r profiad, gan ei fod wedi fy helpu i ddod yn fwy hyderus wrth adolygu gwaith a gweld pethau o safbwyntiau gwahanol.<\/p>\n

At ei gilydd, rwy wedi mwynhau’r gwaith ei hun a bod yn rhan o’r t\u00eem yn fawr iawn. Mae’r interniaeth wedi rhoi profiad imi mewn meysydd na fyddwn i fel arfer yn dod ar eu traws yn fy ngradd, gan fy helpu i ddatblygu sgiliau cyfathrebu, ymchwil, creu cynnwys a gweithio mewn cyd-destun proffesiynol.<\/p>\n

I fyfyrwyr sy\u2019n ystyried interniaeth yn y dyfodol, fy nghyngor fyddai manteisio i’r eithaf ar yr amrywiaeth o gyfleoedd sydd ar gael a bod yn fodlon ymroi i gyfleoedd newydd. Peidiwch \u00e2 bod ofn gofyn cwestiynau a gwnewch yn si\u0175r eich bod yn siarad \u00e2 chroesdoriad o bobl yn y t\u00eem. Dylech chi fod yn barod i gymryd rhan mewn gwaith sydd efallai\u2019n anghyfarwydd ichi. A dweud y gwir, dysgais i rai o\u2019r pethau mwyaf defnyddiol drwy wneud yr union beth hynny yn ystod yr interniaeth.<\/p>\n

Myfyrdod Marianna<\/h2>\n

Diben lleoliadau ac interniaethau dros yr Haf Prifysgol Caerdydd yw rhoi profiad gwaith ystyrlon \u00e2 th\u00e2l i fyfyrwyr sy’n eu galluogi i ddatblygu sgiliau proffesiynol, cael cipolwg ar sut mae’r Brifysgol yn gweithio, a chyfrannu at brosiectau sy\u2019n cael effaith amlwg ar ddysgu, addysgu, ymchwil a chefnogi myfyrwyr. Un o nodweddion allweddol y cynllun yw ei bwyslais ar gydweithio rhwng myfyrwyr a staff, gan greu cyfleoedd i fyfyrwyr gyfrannu eu safbwyntiau unigryw tra eu bod yn datblygu hyder, sgiliau cyflogadwyedd a phrofiad proffesiynol.<\/p>\n

Mae wedi bod yn bleser gweithio gyda Josh drwy gydol ei interniaeth. Ac yntau\u2019n fyfyriwr presennol, fe wnaeth ei safbwyntiau ein helpu i sicrhau bod yr adnoddau’n berthnasol, yn hygyrch ac yn ymatebol i anghenion myfyrwyr. Roedd hyn wedi atgyfnerthu\u2019r manteision o weithio gyda myfyrwyr yn bartneriaid yn ogystal \u00e2 dangos sut mae modd i safbwynt y myfyriwr wella safon ac effaith prosiectau.<\/p>\n

Manteisiodd ar bob cyfle gan ddangos brwdfrydedd, chwilfrydedd ac ymrwymiad gwirioneddol i gynhyrchu gwaith o safon. Mae gweld ei hyder yn tyfu, ei syniadau’n datblygu a’i ddealltwriaeth o ddysgu ac addysgu yn dyfnhau wedi rhoi boddhad arbennig. Yn yr un modd, mae ei gyfraniad wedi tynnu sylw at werth ehangach rhaglen interniaethau Prifysgol Caerdydd o ran meithrin partneriaethau go iawn a phwrpasol rhwng y staff a myfyrwyr. Mae cyfraniad Josh yn dangos sut mae gweithio gyda myfyrwyr yn bartneriaid yn cyfoethogi prosiectau, yn gwella allbynnau ac yn sicrhau bod adnoddau a gwasanaethau’n parhau i gael eu seilio’n gadarn ar anghenion a phrofiadau’r myfyrwyr, sef union ddiben y gefnogaeth.<\/p>\n

Ar ran yr Academi Dysgu ac Addysgu a Gwasanaethau\u2019r Llyfrgelloedd, rydyn ni\u2019n ddiolchgar am ei gyfraniad ac yn dymuno pob llwyddiant iddo yn y dyfodol.<\/p>\n

Allbynnau\u2019r Interniaeth<\/strong><\/h2>\n